Booking.com

呢日朝早唔使趕時間,可以慢慢煮個早餐食完先出車,出發去今次旅程嘅最後一站,皇后鎮。

去旅行嚟講,我個人其中一個最有興趣去嘅地方,就係當地嘅本土市集。所以計劃行程陣時,我都會專登留意一吓每個落腳點附近會唔會有啲又熱鬧又有本地特色嘅街市市集可以過去行吓。



幾好彩今次碰啱係星期六到達皇后鎮。當夏季來臨,紐西蘭好多城鎮都會係假日開辦一啲唔同主題嘅露天市集;呢啲市集一來可以俾當地嘅農民多啲渠道推銷一吓佢哋出産嘅農作物,二來當地嘅藝術家同工藝家亦可以通過呢啲市集展示同促銷自己嘅作品。正因為呢啲市集主要目的都係推廣本土嘅產物,加上呢啲市集開市時都係人山人海,行呢啲市集就能夠係熱熱鬧鬧嘅氣氛之下睇到別具紐西蘭特色嘅民情風貌嘞


在較大的地圖上查看紐西蘭南島自駕遊 2014 - Queenstown

呢個朝早我哋 9 點零鐘由 Te Anau 出車,大約 11 點就到達呢日行程嘅第一站,Queenstown Remarkables Market。上面個地圖就記低咗呢個市集嘅位置。



呢個市集有兩個特色,首先係圍繞住市集 Remarkables Mountain 嘅 360° 山巒景致;另外就係市集入口一個紅色穀倉 (The Red Barn) 亦係市集嘅特色標致嚟。



呢個市集只係響春夏時節開辦,今年 2014 年度就由 13 年 10 月 26 日開到 14 年 4 月 19 日,逢星期六只要當日好天唔落雨,就由朝早 8:30 開到 晏晝 1:00。



穀倉外邊係露天市集,各個店家係道擺賣各種自家出產製作嘅商品食品,四周圍人頭湧湧氣氛非常熱鬧



呢啲市集好多時都有現場 Live Show 表現助興;我去到當日就有呢位名叫 Paul Winders 嘅歌手現場獻唱。睇番網上資料呢位歌手正職係 Arrowtown 嘅一位教師,工餘時間就同屋企人夾 band,佢隊 band 都曾經出過兩張唱片的說



好幾年前香港啲商場都好興搞個波波池,等啲家長有個地方放低個細路然後安心去 shopping



而呢道啲師奶們就可以掉個細路落個沙池道玩,之後就可以安心係隔離木櫈道坐低同朋友吹水嘞



呢啲市集查實亦提供咗一個廉價而又人流暢旺嘅地方,俾好多本地嘅手工藝家擺賣佢哋嘅作品。



首飾就係其中一種熱門嘅商品嚟;呢兩日行過啲市集,都見唔少檔口係擺賣各類唔同嘅手作飾物。



亦有好幾檔係擺賣各類木工同布藝嘅製品。



呢道亦可以搵到好多本地製作嘅手作產品;例如呢檔就係皇后鎮一家製造 Handmade Soy Wax Candle 嘅店家。



除咗手工藝品外,呢道都有賣好多自家製作嘅加工食品;見有檔係賣嚟自 Wakatipu 嘅手作 Elderflower Cordial。



雖然話呢道啲市集主要目的都係推廣本地製造嘅產品,不過都會有啲檔口係例外嘅。例如呢檔 Stir Tea 賣嘅查實係進口貨嚟,不過佢哋嘅包裝同品質控制中心都係響皇后鎮嘅



不過呢道啲市集最吸引嘅應該都係各種新鮮蔬果肉類同麵包芝士等嘅食品。因為呢啲新鮮食品好多都係直接出自當地嘅農場或者生產基地,當地好多本地人都覺得係呢啲市集買到嘅,比係超市賣緊嘅同類貨品嘅品質高好多,所以佢哋都會專登過去呢啲市集開餐同入貨



查實係個市集見到啲 BBQ 真係非常之吸引 ,不過都決定要忍一忍口,是關必需要留定個肚,一陣落到市中心有樣嘢食去到皇后鎮係非食不可嘅



行完 Remarkables Market, 先番呢日我哋係皇后鎮住宿嘅旅舍放低啲行理同泊低架車。今次我哋係皇后鎮入住嘅係呢間舖號 The Flaming Kiwi Backpackers 嘅旅舍。



因為第二日離開呢間旅舍陣時太匆忙,忘記咗影低呢間旅舍設施啲相,所以只係呢道簡單講兩句我個人對呢間旅舍嘅評價。旅舍整體嘅衛生清潔程度大約同呢個旅程第一站係基督城住嗰間 The Old Countryhouse Backpacker 感覺上差唔多;不過呢間旅舍無論室內同室外嘅空間都比基督城住嗰間細。呢個旅程住過咁多間旅舍,感覺係紐西蘭南島呢邊似乎人口越少嘅城鎮,啲旅舍嘅質素反而越好。呢間旅舍衛浴設施嘅衛生程度可以接受,熱水亦充足。我哋係皇后鎮住呢兩日都冇煮食,所以亦冇太深究過呢道厨房啲設施;但見厨房啲杯碗餐具都算係乾淨企理。我個人對呢間旅舍整體嘅評價算係不過不失,唔算好好但亦唔算太差嗰隻。

係旅舍放低行理之後,剛好亦到午飯時間;我哋步行去到皇后鎮市中心,首先第一件事先去醫肚。