Arrowtown & Kawarau Bridge Bungy Jump - 紐西蘭南島自由行 Day 8

呢日係今次紐西蘭行程嘅最後一日，晏晝三點咁上下就要揸番部車到達皇后鎮嘅機場還車，所以呢日只可以行吓皇后鎮附近嘅景點。朝早係旅舍食完早餐同 check out，之後就出車去呢日行程嘅第一站 ~ 箭鎮。


在較大的地圖上查看紐西蘭南島自駕遊 2014 - Queenstown

Arrowtown 距離皇后鎮大約半個鐘車程，係一個充滿歷史嘅淘金小鎮嚟。話說 1861 年首次有人發現係 Arrow River 有豐富嘅藏金，到 1862 年已經有超過千五人嚟到呢道搵發達嘅機會，而當中亦包括係清代光緒年間越洋過海嚟到呢道尋夢嘅中國人；到今日呢班中國人係呢道居住過嘅遺跡亦係箭鎮其中一個觀光點嚟。



到當年嘅淘金活動式微後，呢道啲人亦曾經依靠農業貿易維生。後來呢道嘅人口不斷下降，到近數十年先因為旅遊業帶番旺呢個小鎮。



一來呢道有過一段輝煌嘅淘金歷史，二來亦多得魔戒效應，好多去皇后鎮觀光嘅遊客都喜歡花數個鐘過一過嚟呢道短暫旅遊。



因此呢道亦充斥住各式餐廳、咖啡店、糖果店、紀念品店、金店同羊毛店等等做遊客生意嘅店舖。



呢個小鎮嘅遊客區查實好細，主要係 Buckingham Street、呢條街附近嘅 Arrow River 同一個 Chinese Settlement 嘅遺址。



查實現時呢道河邊依然可以淘金；遊客可以去 Information Center 租個淘金盤，去 Arrow River 碰碰運氣，或者有機會淘番幾粒金沙番老家留念都唔定 。



昨日同行嘅朋友想玩 Skydive 唔成功想今早再去 Nzone 碰吓運氣；如果有啲預約咗嘅人 no show 嘅話執到雞就可以係今日我哋上機前玩到。我哋係 Arrowtown 四圍行咗陣見時間差唔多，就出車番皇后鎮。可惜今次去到 Nzone 得知佢哋呢程 Skydive 又係因為風大全團取消 。



冇計朋友今次旅程此終同跳傘無緣。我哋再由皇后鎮出車，出發去 Kawarau Bridge 睇笨豬跳。Kawarau Bridge 係全球第一個營辦商業化笨豬跳嘅場地；係 1988 年由 AJ Hackett 創辦。由 Kawarau Bridge 起跳點到下面 Kawarau River 有 43 米高，跳嘅人可以選擇掂唔到水，剛好掂到水面，同直插落水裡面幾種唔同嘅跳法 。

要贏人先要贏自己 ~ Jump 呀

可能呢道係笨豬跳發源地嘅關系，似乎特別多人嚟呢道玩呢項極限運動。我哋落咗車未行到去道橋嘅位置已經聽到一陣陣嘅歡乎聲。係橋上面玩笨豬跳嘅人係一個接一個，絕無冷場 。除咗一般睇開嘅單人跳之外，現場亦見到有對男女玩雙人跳。印象中都好似係第一次見呢隻笨豬跳嘅玩法。



睇過幾位勇者嘅表現 ，之後我哋再去旁邊精品店打個白鴿轉順便借個洗手間，跟住就番停車場出車去今次行程嘅最後一站 ~ Wanaka。