高美濕地 - 搭客運公車台中自由行

落咗車沿住堤岸一路行，遠遠已經可以望見嗰條長長嘅木棧道。堤岸側邊有啲賣小食嘅商店，有啲商店重會經營收費嘅洗手間。不過查實木棧道入口附近都有個免費嘅公廁，哩個公廁重要係幾乾淨的說。



高美濕地都算係個變遷得幾神奇嘅地方嚟。上個世紀，查實都係講緊五六十年前，哩度原來係一個可以俾遊人嚟到游水同晒太陽嘅沙灘嚟。後來因為台中港嘅興建，哩度嘅沙灘逐漸淤塞；自從台中港務局開始喺台中港北方築起北岸沙堤之後，更加速哩度啲泥沙嘅淤積速度，慢慢就形成家陣濕地嘅生態。

哩條棲地棧道係喺 04 年年中嗰陣建成，查實都唔係起好咗好耐。要保育濕地嘅生態，一般情況下都會盡量避免喺濕地上面起任何人造設施吸引遊人。濕地要遠離人煙，底棲動物先可以豐饒生長，然後吸引眾多水鳥嚟到覓食。不過據說台中市政府起哩條棧道嘅目的並唔係為咗吸引遊人。相反，哩條棧道嘅作用係用嚟規範遊人喺濕地嘅活動空間，減少對濕地嘅破壞。





過去高美濕地退潮嗰陣，哩度啲遊客經常唔理啲警告行出去海岸挖文蛤同捉蟹，造成嚴重嘅生態破壞。





為咗阻止民眾破壞環境，又同時滿足民眾接近海岸嘅想望，相關單位就諗到規劃哩條橫跨濕地嘅木棧步道，等啲民眾可以用哩條木棧道進入濕地欣賞海景，同觀察木棧道周遭嘅動植物生態。





哩日嚟到高美濕地嗰陣嘅時間尚早，四圍行行企企等咗成個幾鐘，先至等到出現金黃日落嘅哩一刻 。

雖然話起哩條棧道嘅目的喺希望啲遊人減少行落去海岸，破壞嗰度嘅濕地生態；不過嚟到見到哩度嘅遊客此終都係好喜歡除鞋赤腳咁走落去濕地上面玩同影相。





哩度個洗手間前面整咗個小水池裝咗啲乾淨嘅淡水，我估哩個水池整出嚟應該係為咗方便啲遊人行完濕地上番岸嗰陣可以有啲乾淨水洗吓對腳。哩啲設施就好似反而鼓勵咗嚟到哩度嘅遊客行落去濕地上面玩咁。





查實木棧道未出現之前，哩度有條泥濘小徑，靠兩邊綁住竹桿同繩劃出界線，希望遊客唔好越過界線，踩踏濕地同雲林莞草嘅環境，甚至去捕捉小動物。

今日嚟到見到插咗喺泥灘上面嘅哩啲竹桿，可能就係當年嘅泥濘小徑。





到五點鐘咁上下個日頭差唔多收晒，要開始諗諗點離場嘞。

由高美濕地哩度可以坐 178 或者 179 號公車去清水火車站，再轉車去其他嘅目的地。睇完日落哩個鐘數嚟講，179 號有一班車喺 18:30 由高美濕地遊客中心開出，178 號嘅開出時間就係 19:00 同 21:00。





除咗公車之外，查實嗰度重有好多的士嚟到哩度釣泥鯭。哩班司機做生意都做得相當有規有舉 ，問過幾個司機去清水嘅話點收費，個個嘅開價都係每位台幣 80 大元。



嗰日睇見個場咁多人，一來有少少驚齋等嗰兩班巴士嘅話未必上到車，二來等 18:30 哩班車都要等幾耐吓亦唔一定有車上，加上幾草嘢夾車亦唔係太貴，於是搵咗個司機幫手夾咗一車連埋我六個乘客車去清水，喺中山高美路口嘅一個巴士站度落車。



哩晚想去一中商圈嗰頭搵地方食飯；經哩個巴士站嘅 304 號或者 9 號公車都啱搭。等咗一陣有部 9 號公車到站，就坐佢番去一中商圈嗰頭，喺中友百貨站落車搵食嘞。



哩晚嚟吔飯嘅哩間韓 34 韓國料理都係睇台灣啲網上食評推介於是過嚟試吓嘅。



哩間食店店內嘅裝修都算乾淨企理，餸菜嘅價錢唔算貴份量亦過得去。

哩度白飯泡菜汽水機汽水都係無限任飲任食，去自助櫃枱前面自己添飯添飲就可以，相當抵食 。



踩足成日，食完個晚飯之後已經冇乜力再行夜街，於是行番過去中友百貨前面嘅車站等車番歸嘞。喺中友百貨有好多條巴士線都可以坐番去台中火車站，例如 55、58 號公車等。哩日番到酒店已經十點，又要快快手沖凉上床瞓覺，义番足電準備明日嘅行程嘞。