梧棲漁港 - 搭客運公車台中自由行

未開始哩日嘅行程之前，先帶各位團友睇睇哩幾日我哋喺台中住哩間客棧嘅早飯有啲乜東東食。



喺哩間客棧食嘅主要係中式早餐，有白粥有炒麵，餸菜款式每朝都有六七款，唰得嘅話仲可以整番碗魯肉飯，相當頂肚 。



哩個朝早七點零鐘就起咗身，可以慢慢食個早餐磨到八點幾鐘先出發，第一站先去梧棲漁港行吓。



由台中火車站可以坐 307 號公車去梧棲漁港，哩條公車線喺台中火車站哩邊嘅車站係一個中途站嚟，下面個地圖就記低咗哩個公車站嘅位置。



程公車由台中火車站去到梧棲觀光漁港站大約個零鐘車程，拍悠遊卡嘅話車費盛惠台幣 47 元。

是關梧棲觀光漁港站係終點站嚟，所以坐哩程車就坐得比較輕鬆，唔使吓吓開住個地圖睇住部巴士到站未。



大約朝早十點半鬆啲架巴士就到達梧棲漁港站。出發前上網搵資料嗰陣見人哋遊記啲相，印象中哩個觀光漁港應該係一個幾熱鬧嘅旅遊地點嚟。不過嚟到哩日就發覺哩度並唔係想像中咁熱鬧，甚至可以話係有啲冷清嘅感覺 。



本來預期嚟到會見到一檔檔熟食檔口，擺賣各款海鮮熟食同乾貨，人頭湧湧嗰隻；但係嚟到見到啲熟食檔口有開檔嘅只係得小貓三四檔。



當時我諗可能我嚟到哩日唔係假日所以個場先至咁冷清，不過後來我去到高美濕地嗰陣又見到嗰邊查實又幾多人吓咁。



所以我估去高美濕地嘅遊客當中，會好似我咁經一經哩度去行吓個漁港嘅人似乎就唔多嘞。熟食檔哩邊冇乜嘢睇，於是行番出去海邊四圍探索吓。



查實計劃行程嗰陣，其中一個吸引我想嚟哩度行吓嘅原因就係哩個喺海邊嘅木搭平台。



嗰陣時刨人哋啲遊記，見人哋影哩個平台啲相影得幾靚，於是俾人哋啲靚相挑起咗條根，想過嚟睇吓。



不過嚟到發覺哩個木搭嘅平台已經俾啲圍欄封住咗 ，只係中間留咗條通道俾人行過去海邊啲碼頭度。



查實我見個平台上面啲木板好似都有啲殘殘哋，我估個平台可能因為日久失修已經唔多穩陣；封咗唔俾人入去可能係驚如果多人喺上面走嚟走去嘅話會踩冧個台都未定 。



由個平台沿住海邊啲碼頭一路行，沿途都可以見到好多漁船泊咗喺沿岸啲碼頭度。



一路行時不時會見到啲漁民喺路邊修補整理佢哋啲漁網。



喺碼頭出面行咗陣，跟住就行番入去漁市場入面睇吓晏晝餐飯有乜著落嘞。



漁市場入面基本上分開賣新鮮海產同賣熟食兩個地區，入面嘅環境我覺得同香港市政局啲街市分別唔大。



只係哩個街市比較闊落，同差唔多清一色只賣海產。



見哩度有一兩檔係賣啲魚乾鹹魚之類嘅乾貨，其他啲檔口就主要係賣各類新鮮魚蝦蟹貝類海產之類嘅濕貨。



之前睇過一啲遊記講話可以喺哩度啲魚檔買咗啲新鮮食材，再拎去隔離熟食檔嗰邊搵人代煮；不過我今次嚟得一條友，就比較難玩哩家嘢嘞。



喺魚檔哩邊行咗陣，亦差唔多到食晏嘅時間；於是行過去漁市場另一邊嘅熟食檔，睇下嗰邊有啲乜嘢好食嘞。