新社花海 - 搭客運公車台中自由行

哩個朝早喺酒店食完個靚早餐，八點零鐘就出門；第一個目的地係新社花海。新社花海係台中一年一度嘅大型農業博覽活動；哩個活動每年都係喺十一月頭至十二月頭哩段日子舉辦；2015 年嘅舉辦時間就由 11 月 7 日去到 12 月 6 日。



先講吓去哩個新社花海嘅交通。跟據新社花海嘅官方網站公告，其中一個去花海嘅方法(平日)係去北屯區嘅太原停車場坐免費接駁巴士；哩程巴士平日由 08:00 至 16:00 由太原發車，大約每半個鐘一班由太原停車場開出，不停站直駛到花海嘅博覽會場。因為就算係平日非假日嘅日子，都會有大量嘅人潮湧去參觀哩個花海博覽，喺太原坐接駁車嘅話就有可能因為太多人而要等好耐先可以上到車。



我喺台中火車站要去太原嘅話查實都要坐一程公車，所以哩次去花海博覽我就行另一條路線，由台中火車站坐公車直接去到會場附近嘅中興嶺站。



270、271、276、277 號都係經台中火車站駛到中興嶺站嘅公車路線。



哩日朝早我喺火車站哩邊巴士站就等到架 276 號公車到站，大約一個鐘車程就到達中興嶺站，車費盛惠台幣 20 大元。



喺中興嶺站步行去花海嘅會場大約要行半個鐘左右。唔想行嘅話，喺中興嶺公車站哩度亦有個車站可以坐免費嘅接駁巴士去到花海會場。



嗰日我見一早嚟到又唔係好趕時間，於是試吓跟一跟上接駁巴士條隊睇下上唔上到下一班車，唔得先行路過去。又幾好彩等咗一陣就嚟咗兩部大巴，剛剛好上到第二部大巴唔使行路過去。



嚟到台中幾日，發覺台中有樣嘢實在係幾神奇嘅，就係哩個城市真係好多嘢都係免費嘅。



坐公車首十公里免費，嚟花海哩度嘅接駁巴士免費，自己渣車嚟到泊車有免費停車場，會場可以免費無線上網，咁大陣像嘅一個博覽會入場都係免費，你都咪話嚟哩度玩確係幾著數 。



朝早十一點咁上下就嚟到花海嘅會場。



由停車場落車，首先會進入台中國際花毯節嘅會場。



哩個朝早天氣唔係太理想，天陰陰之餘重時不時有幾陣驟雨。







我嚟到哩日查實已經唔係假日，不過個會場依然係多人到賓虛咁嘅場面 。





難以想像到咗假日嗰陣哩到會迫成點嘅狀況。







哩個會場主要係擺設唔同嘅花景同活動設施，好似萬花之心，風車花境，希望音符，微笑盆栽，奇幻茶壺等等。







行過吓花毯節嘅會場，跟住已經急不及待想走去哩度最有睇頭嘅花海會場嗰邊。







哩度除咗有花花睇之外，仲有嘢買有嘢食，真係一次過滿足晒三個願望 。





場內哩個行銷區主要係賣啲例如新鮮蔬果、盆栽、乾果冬菇之類嘅乾貨食品等等嘅各類農產品。



市場入面重有好多飲品同熟食攤檔。哩日原本嘅計劃係行完哩度嘅花海之後過去新社莊園嗰邊行吓同食埋個晏晝飯嘅。







不過喺哩邊啲攤檔掃咗幾檔口垃濕，到晏晝食飯時間都唔覺點肚餓。

加上哩日上晝啲陽光麻麻，但到咗晏晝見個太陽開始出番嚟。





於是決定放棄新社莊園嘅行程，晏晝留番喺花海哩邊補番多啲有陽光嘅花花相 。







花海會場哩邊主要係由大片大片唔同顏色、唔同形狀、唔同品種嘅花田所組成。







當中最搶眼嘅，應該都係嗰度一片片唔同顏色、一望無際嘅波斯菊花田。







天晴陽光好嘅話，我估哩度影日落會相當靚。





不過哩日重想去埋大坑橋嗰頭影夜景，加上見哩度現場咁多人，走嗰陣搭車排隊應該要花唔少時間，所以哩日喺會場度都唔做得留太晏；到四點鐘咁上下，就出番去停車場嗰邊搵車撤退嘞。