Strokkur Geyser - 冰島夏日環島自駕遊

喺 Strokkur Geyser 景區附近有兩個停車場可以泊低架車再行入景區，其中一個停車場比較近附近一個遊客中心，而我哋就喺比較近景區嗰個停車場度泊低架車；下面個地圖記錄咗哩兩個停車場同 Strokkur Geyser 嘅位置。



一落車當然係向住最多人哇哇聲咁圍觀嗰個位置行過去喇，未行到去泉口，就已經聽到遠處 “嘭” 一聲，跟住一條大水柱直沖上半空。



Strokkur Geyser 哩個位於 Haukadalur Valley 嘅間歇泉，應該係冰島其中一個最活躍嘅間歇泉嚟。



哩個泉大約每隔五至十分鐘就會噴發一次，不過我哋喺現場都見過泉口噴完一次之後，相隔唔夠半分鐘又再度噴發嘅情況。



圍住個噴泉影相嗰陣要經常留意住風向，事關大風嗰陣萬一企正逆風位，又剛啱個泉係面前一爆 … 咁就會變成一隻用泉水落湯嘅落湯雞㗎喇。



哩個間歇泉一般噴發嘅高度大約係十零廿米，不過有時泉水都可以噴到上四十米咁高㗎。



除咗 Strokkur Geyser 之外，查實哩度附近重有一個喺冰島都好出名嘅間歇泉 Geysir。



不過哩個 Geysir 間歇泉近年已經冇再自然噴發。每年喺 Icelandic National Day，冰島官方認可嘅地質學家會用人工嘅方法去引發 Geysir 噴發一次。



喺 Strokkur Geyser 周圍重有好幾個藍藍綠綠嘅 Geothermal Pool 同啲 Mud Pools，都係火山區特有嘅地貌嚟。



Strokkur Geyser 前面有個山坡，山坡上面開滿一大片紫色嘅魯冰花，見啲花開得咁靚當然要行上去影返幾張相喇。



哩日我哋整定咗啲三文治同沙律做午餐，睇完間歇泉之後就喺附近個停車開飯嘞。食完個晏，跟住就繼續開車踩去 Golden Circle 第三個重點景區 Gullfoss 黃金瀑布嘞。