向 Egilsstadir 進發 - 冰島夏日環島自駕遊

哩日我哋去到下一站喺 Egilsstaðir 嘅民宿之前都冇乜好特别嘅景點要行，都係途中揾啲叫做有少少嘢睇嘅地方停一停攤抖吓；下面個地圖就記低咗哩個朝早我哋停留過啲中途站嘅位置。



哩日第一個中途站係一處海邊嘅地方嚟，原本都冇諗住咁早就停第一站嘅，不過行過見哩度好多車泊咗喺度，大家心諗咁多人都喺度停車嘅話，跟大隊點都會有少少嘢睇呱 ~



嚟咗冰島咁多日，到哩日先醒起要幫我哋今次冰島團嘅第五位團友，哩部 Subaru Outback 4WD 影吓相。喺哩度海邊散咗一陣步，跟住就上返車繼續沿住一號公路進發嘞。



跟住第二個停站係喺 Djúpivogur，喺哩度停一停主要係因為想借個洗手間鬆一鬆 。喺 Djúpivogur 哩度有個碼頭，碼頭附近有個免費嘅洗手間；Djúpivogur 嘅位置大約就喺 Hofn 去到 Egilsstaðir 哩段路途嘅中段，所以哩個洗手間係哩段路程中一個幾熱門嘅停站位置嚟。



喺哩個洗手間過冇幾遠嘅一處海邊有一個名為 Eggin í Gleðivík 嘅藝術擺設，哩個由冰島藝術家 Sigurður Guðmundsson 創作嘅戶外裝置，由 34 隻巨蛋代表 34 隻冰島嘅本地雀鳥；有機會去到嘅話，可以留意吓當中有一隻蛋係比其他蛋大隻啲嘅，嗰隻蛋所代表嘅雀鳥名為 Red Throated Diver，係 Djúpivogur 嘅市鳥嚟。喺 Djúpivogur 攤抖夠，跟住我哋就上車一鼓作氣直踩去 Egilsstaðir 度嘞。

由 Hofn 去到我哋嘅下一站 Egilsstaðir，頭一段路主要係沿住海邊嘅 1 號公路行進；到一處叫 Bberufjörður 嘅峽灣附近，就可以選擇轉行一條比較近嘅 939 號公路，向北面行一段路再接返上 1 號公路；如果行哩條路線，由 Hofn 去到 Egilsstaðir 就大約要行 187 公里。

而另一個選擇，就係繼續沿住海邊兜一條比較遠嘅路線全程行 1 號公路去到 Egilsstaðir；如果行哩條路線嘅話，由 Hofn 去到 Egilsstaðir 就要行 247 公里，路程比行 939 號公路多咗 60 公里。

不過 939 號公路係一條出名難行嘅公路嚟，我喺網上睇過幾個遊記直頭係用 "死亡 939" 嚟形容哩條公路；雖然查實咁嚟形容哩條公路係誇張咗少少，事關我睇過啲有關哩條 939 號公路行車嘅 Youtube 片段，見哩條路雖然崎嶇不過唔似有好危險嘅路段；不過基於安全至上哩個原則，我哋就選擇避開哩條 939 號公路情願行遠少少。查實除咗哩段路線之外，我哋出發前都有上去 road.is 查返我哋計劃行走嘅路線當中邊啲路段有 Gravel Road，可能嘅話我哋都會盡可能避開哩啲難行嘅路段。



上面個截圖係我出發前喺 road.is 下載嘅一幅路況圖嚟；當時除咗 939 號公路係 Gravel Road 之外，查實 1 號公路轉向北面之前都有一段 Gravel Road 要行。當時我嘅考慮就係既然都諗住安全至上避開啲 Gravel Road 嘅話，咁就無謂避一段唔避一段，於是索性再兜遠少少，經 96 號公路轉入 92 號公路；行哩條路線由 Hofn 去到 Egilsstaðir 就要行 299 公里，比起行 939 號公路要行多個零鐘嘅車程。



大約晏晝三點終於到達 Egilsstaðir，未去民宿辦理入住手續之前，我哋先去附近一間 Bónus 超市上貨，跟住就諗住去民宿搞入住手續同擺低啲行李嘞。