Rhein Falls 萊茵瀑布 - 瑞士自由行之旅

終於到咗今次行程嘅最後一日，呢日我哋會先去 RheinFall 睇瀑布，跟住再搭程火車去 Schaffhausen 嚟個快嘅 city tour，黃昏前要去到蘇黎世機場搭六點鐘嘅班機離開瑞士返香港。



呢站民宿嘅屋主幾好人仕，俾我哋喺佢住宅大厦一個儲物室暫存住我哋啲行李，咁呢日就可以慳返嚿幾兩嚿水寄存行李嘅費用嘞。



查實 RheinFall 距離我哋住宿嘅位置唔係好遠，所以我哋出門後就直接沿住像畫那樣美嘅萊茵河畔散吓步順便行過去。



行咗半個鐘鬆啲，開始見到河道上嘅水流愈嚟愈急，前面一片洶涌澎湃嘅就係傳説中嘅 Rheinfall 萊茵瀑布。





呢座萊茵瀑布大約喺一萬四千年前到一萬七千年前形成，網上有啲講法話 RheinFall 係歐洲流量最大嘅瀑布。



不過亦有啲網站話冰島嘅 Dettifoss 黛提瀑布先係歐洲流量最大嘅瀑布，咁邊個啱啲就真係不得而知嘞。



每年初春嘅融雪時期，係萊茵瀑布水流量最大嘅時候，我哋喺夏季呢段日子嚟到所睇到嘅平均水流量都有每秒 600 立方公尺。



到冬季呢度嘅水流量就降到大約每秒 250 立方公尺，而呢度全年平均水流量就大約係每秒 373 立方公尺。



由於水量豐沛，自從 19 世紀以嚟呢度就設有水力發電廠，為附近沙夫豪森嘅工業提供電力。



萊茵瀑布對出有個細細嘅湖泊，湖水最深處大約有 13 公尺。喺瀑布中央有兩座岩石，可以喺湖邊嘅碼頭乘搭遊船抵達。



我哋喺瀑布北岸嘅湖邊行完，跟住就檻過一條有火車軌嘅橋去瀑布南岸嗰邊行吓。





行完亦可以順便喺嗰邊嘅勞芬城堡 Schloss Laufen 站坐火車去 Schaffhausen。



喺南岸呢邊嘅勞芬城堡除咗係火車站之外，亦有一個收費嘅觀景台。



不過我哋喺城堡買飛入場嗰層都揾到啲可以望落去下面瀑布嘅位置，心諗落去觀景台睇到嘅風景應該都唔差太遠。



所以都冇科水入場，喺觀景台個𨋢口位影完相就直接行落去火車站等車去 Schaffhausen。