英國 Roman Bath Museum 羅馬浴場 - 英國自由行

開始第十日嘅行程，之前一日到達 Bristol 嗰陣已經見個天氣越嚟越差，到呢個朝早個天氣直頭可以用惡劣嚟形容。


喺呢啲橫風橫雨嘅日子，只可以揾啲喺室内嘅活動做吓，於是大伙兒就 checkout 出車去 Bath 行吓博物館。



Bath 呢個市鎮喺公元 70 年嘅古羅馬時代曾經係一個温泉聖地，呢度有一座羅馬浴場嘅遺址，後來當地 North East Somerset Council 就喺呢座遺址上起咗依家呢座博物館，現今 Roman Bath Museum 就成為世上其中一個保留得最完整嘅古羅馬遺跡。


呢座遺跡中主池嘅泉水係源於附近 Mendip Hills 嘅地熱温泉，依家呢啲泉水嘅水質已經唔適合浸浴，綠色嘅泉水係源於水池露天，日照加上泉水中嘅礦物質令藻類滋生。上世紀 1978 年就曾經有個女仔真係跳咗落池入面游水，之後腦部受細菌感染最後瓜咗，而呢次事件亦引至博物館關閉咗好幾年。


今次喺 Bath 嘅行程我印象最深刻嘅查實唔係參觀博物館，而係英國嘅天氣。我哋呢次去到英國已經係 7 月盛夏時份，我哋出發前曾經出過一單倫敦閲兵綵排嗰陣有衛兵中暑暈低嘅新聞。

原本出發前我重擔心梗呢次行程預訂嘅所有住宿都冇冷氣，萬一撞正歐洲熱浪嘅話夜晚瞓覺會好唔舒服。結果呢次行程全程住宿都係冇開冷氣嘅需要，帶去嘅清涼短袖衫基本上都冇著過。


而呢一日喺 Bath 碰啱橫風橫雨，原來英國打起風上嚟就算盛夏時節都可以凍到好似香港刮寒流咁嘅温度。我哋行完 Roman Bath，出面重係大風大雨凍過雪條，我哋急急腳行過去 River Avon 影一影 Pulteney Weir，之後就揾間餐廳座低食啲嘢避一避啲風雨。


食完嘢到下午我哋就出車開往下一站喺 Wales 威爾斯嘅住宿。