到尾二嗰日嘅行程，呢一日我哋會由 Wales 揸車去 Bicester Village 巡一巡舖，之後再返倫敦近郊嘅住宿落腳。

我哋今次英國之行尾二呢一站嘅住宿係喺 Wales 一個叫 Aberaman 嘅小鎮，平日應該冇乜遊客會嚟呢度，我哋嗰晚喺一間中餐館 Wok U Like 嗌外賣食，個中國人老闆係好好奇咁問我哋無喇喇做乜會嚟咗呢個小鎮度。

呢次我哋揸一程長途車嚟到 Dale Princess，原因係預訂咗去一處叫 Skomer Island 嘅 Day Tour，坐船上一座可以近距離親近 Puffin 海鸚鵡嘅島嶼遊覽，所以呢一日係我哋喺今次英國之行中最需要好天氣嘅日子。查實我哋到達 Dale Princess 嗰日黃昏啲風雨已經開始停，天空亦漸漸放晴。