Booking.com

之前一晚知道去 Milford Sound 條 Highway 因為大雨封咗路,嗰晚都幾擔心第二日預約咗去 Milford Sound 程船河有冇得成行。我哋當日預約咗嗰程船河開 11 點,我哋係 Te Anau 查實最遲 8 點幾鐘就要起程出發。

呢個網站可以睇到呢條 94 號 Highway 最新封路同重開嘅路況。嗰日我哋朝早起身,第一時間開手機睇佢 7 點半鐘嘅路況,可惜個網站依然係顯示緊封路 。不過問番其他都係等緊出發嘅同屋就話朝早有班 7 點鐘起程去嗰道嘅巴士團查實已經出發咗。見咁狀況我哋就即時打電話去 Real Journeys 道問,結果 Real Journeys 嗰邊答我哋程船河並冇取消到。既然 Real Journeys 嗰邊咁講加上有先頭部隊已經出發咗,我哋就估條公路應該好快會開番,於是決定照出車起行。



我哋 8 點幾鐘由 Te Anau 出發。上到 94 號公路後,沿途路旁嘅高山石壁都可以見到呢啲一條條由山上流落嚟嘅水柱。途中仲見到幾嚿之前跌咗係路中心未有人清理嘅大石;見到呢個咁得人驚嘅路況先明白點解呢條公路會經常因為天氣惡劣而要封路



呢段車程比我當初想像中快好多。大約揸咗個零鐘車程,就已經到達途中呢條叫 Homer Tunnel 嘅隧道。呢條隧道只有一條行車線,需要睇住隧道兩邊入口嘅交通燈號指示單線雙程行車。隧道入面啲建築都好簡陋吓燈光亦好昏暗,所以揸車過呢條隧道要額外小心同要慢駛。



出咗隧道之後就係一段幾斜同幾多彎嘅山路;要注意係冬天部車嘅車轆係要先上鐵鍊先可以揸車行呢條公路。因為呢條 94 號公路都算係幾蝦人揸吓,特別係惡劣天氣或者係冬天陣時,所以我見有幾多玩自駛遊嘅人去 Milford Sound 會選擇揸車到皇后鎮先放低自己部車,然後參加當地嘅巴士團,免卻自己揸車入去嘅麻煩。


在較大的地圖上查看紐西蘭南島自駕遊 2014 - Catlins & Milford Sound

唔洗三個鐘我哋就到達 Milford Sound。上面個地圖就記低咗呢道碼頭嘅位置。



係碼頭對出有個幾大吓嘅停車場,泊低架車之後要步行大約 5 ~ 6 分鐘先去到碼頭。停車場附近有間 Blue Duck Cafe,據我所知呢間應該係 Milford Sound 唯一一處可以買到嘢食嘅地方嚟。我哋見有時間就先入咗呢間 Cafe 買杯嘢飲等開船。



見時間差唔多,大伙兒就過去碼頭大堂出飛上船。



查實係 Milford Sound 有好幾家旅遊機構都經營緊類似嘅峽灣遊船節目,今次我哋就參加咗比較大路由 Real Journeys 經營嘅 Milford Sound Scenic Cruises



碼頭有好幾個泊位,對啱泊位號碼就可以過去自己條船個泊位排隊等上船。



船入面有兩層客倉,要睇風景就可以上最上層嘅甲板或者去最下層客倉船頭嘅露天位置。



呢日基本上全日都落住雨,好彩隨身帶住件都幾擋得吓雨嘅雨褸,只要雨勢唔係太大我都可以盡量留係甲板道睇風景。



查實呢次落住雨咁遊呢程船河有辣有唔辣;天陰陰咁啲風景自然冇藍天白雲陣時咁靚;但 Milford Sound 景色其中一個重點 ~ 瀑布,係落雨天陣時就會顯得格外澎湃。



遊船係開行之後亦會開放船長室俾遊客入去參觀。



船河其中一項特色節目,就係帶遊客玩沖瀑布。

 
 
 
 


遊船會盡量駛近瀑布底下,等遊客可以親身體驗係澎湃瀑布下沖身嘅感受



查實 Sound 所指嘅意思係好深嘅峽灣;峽灣就係由呢啲有千多公尺高嘅石壁圍繞形成。



嚟到呢兩日都落住大雨,所以石壁處處都可以見到一條條嘅水柱落下。



四處啲瀑布係大雨下亦顯得特別壯觀。

 
 
 
 


遊船途中亦有機會睇到係峽灣居住嘅野生動物,例如海獅、海豚。今次旅程我哋就見唔到海豚,只係見到一群係岸邊石灘道打躉嘅海獅



程船行咗差唔多一個鐘,瀑布沖完海獅睇完,亦見條船向住之前上船碼頭嘅方向行駛,本來諗住呢程船河已經到達尾聲,遊船正番緊碼頭準備俾我哋上岸。



途中又見到一個比較壯觀嘅瀑布;拎住部相機影緊個瀑布陣時就開始覺得有啲奇怪 ~ 典解條船好似越駛越近個瀑布咁嘅 ?



出發前搵資料睇過唔少討論區同博客,一路個印象都係呢程船河會帶我哋沖一次瀑布咁多。



唔知係因為今次船河碰啱落大雨船長特別優惠啲乘客,定還是程船河不嬲都係安排沖兩次瀑布不過咁啱我之前睇開啲資料都冇特別提到;總知見條船向住個瀑布越駛越近,心知要準備迎接呢個突如其來嘅第二次衝擊嘞

 
 
 


呢個瀑布嘅水量比之前沖嗰個大好多,揸住部相機噤咗兩吓已經成個鏡頭都係水點。



一路顧住唔想俾部相機濕太多水一路又影人又 off-finder 影景,手忙腳亂搞完一大輪,到條船駛番出瀑布陣時,就算身上件雨褸由頭笠到落腳結果都搞到成頭濕晒



沖完呢次瀑布程船河先真正到達尾聲。玩到成部相機濕晒第一時間先落番客倉抹番乾部相機。



程船河約莫玩咗個半鐘,到大約晏晝 12 點半我哋就係碼頭落船,再行番去停車場出車繼續呢一日嘅行程。