向喀什米爾進發 - 印度之旅 2009 Day 5 上午

今朝都可謂全個旅程最辛苦嘅一朝早；全團人四點幾已經要響酒店大堂集合。 領隊一邊幫我地打點行理上旅遊巴，酒店就有人分派大大個早餐餐盒比我地上車食。不過咁早起身我都幾肯定今日成個上午我都應該唔會有咩嘢胃口，為免浪費食物我只係響個餐盒道拎咗隻蕉上車。

來往金三角之間嘅公路有樣嘢真係非常之正點嘅，就係公路一帶都冇乜高山同建築物阻礙視線，平時響香港難得一見紅噹噹嘅日出日落美景，依加就搭親車都有得睇。



到7點零鐘架旅遊巴到達中途站比我地團人落車鬆一鬆，上番車再行多兩個鐘車程，9點零鐘到達機場，今次終於冇乜阻滯順順溜溜入到機場候機室了。



上到架飛機發覺一樣嘢幾特別嘅，原來印航去喀什米爾程內陸機比國際線班機新淨好多，坐位有電視睇同餐飛機餐質素都比國際線好，我最初仲諗住咁短途機頂多派包花生我咬吓就算。

坐去喀什米爾程飛機有樣嘢要好小心注意嘅；因為喀什米爾個機場有部份係軍用，所以由上咗飛機嗰刻開始到離開喀什米爾機場範圍為止，都千祈唔好拎部相機出嚟影相。當時我坐架飛機就降落嗰陣有個乘客唔生性拎部相機出嚟影個機場，跟住我見個空中少爺即時指住個乘客 ~~ "I told you don't take any picture!"，我當時仲諗你會唔會好似荷里活啲電影咁跟手嗱支鎗出嚟射個乘客 ~~ 咁當然佢地都唔會惡成咁嘅，不過響喀什米爾的確周街都係啲荷鎗實彈嘅軍人，可見當地局勢依然相當緊張。



我地坐班機大約下午兩點鐘到達喀什米爾機場，當地應該都唔容易揾到啲大大部嘅旅遊巴，所以我地響喀什米爾全程都係坐啲 6-8 坐位嘅四駒車。我地從機場坐咗個零鐘頭車，終於到達今次旅程景色最靚嘅一站 - 斯里納迦嘅達爾湖。