達爾湖船屋 - 印度之旅 2009 Day 5 下午

達爾湖 (Dal Lake) 係喀什米爾最美麗同最大嘅湖泊，素有「東方瑞士」之稱。湖泊長6公里、寬3公里，是由 Gagribal、Loknt 和 Bod Dal 三個湖組成。

喀什米爾早在英國殖民地時期 (1857-1947)，英國官員因著這個地方的山水秘境而趨之若鶩，每年夏天有不少英國和歐洲旅客蜂擁而至。英國人本想在達爾湖畔搭建房舍，作長久渡假之用，但為了避免觸犯當時喀什米爾政府的法例，規定所有本土以外的人仕，都不得擁有土地或在地上建造房屋，英國人便想出在湖邊建造沒有機輪的船屋，作為夏天避暑居庭。後來印度獨立後，英國人大多返回英國，留下來的船屋便用作民居、餐廳和商店之用，有些則改建為旅館，作為招攬遊客的據頭。
 
今次行程大部份團友都編到入住一列相鄰嘅船屋；但我跟我朋友一行四人就被編到對岸另一間舖號叫 Young May Flower 嘅船屋；在達爾湖南面沿岸一條名為 Boulevard Road 的行車徑，沿途有幾個停泊小艇嘅碼頭，最接近我們船屋的是一個就近 Nehru Park 嘅碼頭，Nehru Park 是一個位處湖中央的公園，我地每次從船屋要到其他地方都要先乘小艇到這個碼頭，然後再轉乘汽車前往；下面個地圖可以看到我所記錄到在斯里納迦的各個景點位置。我們所住的船屋 google map 坐標為 34.0938236875635, 74.8435878753662。其他景點準確坐標可在第一篇 Get Ready 篇中提到的 srinagar.kml 坐標檔內找到。



你睇個地圖時可能會覺得奇怪點解船屋同水上菜市場會響陸地上嘅？當時我用部手機記錄個衛星坐標時都有懷疑部手機係唔係 short 咗，不過番到香港去 google map 睇睇個 satellite view 就會明白，地圖入面嗰大片陸地其實係一片中間有好多水道穿梭嘅水上菜園，亦因為菜園一帶沒有車路，所以船屋那裏並沒有陸路可以進出。從地圖個 satellite view 可以看到，達爾湖船屋都集中在北岸，附近一帶都沒有陸地公路，所以從船屋出入市區要先乘搭小艇到南岸 Boulevard Road 其中一個碼頭再轉乘汽車前往。

達爾湖上嘅主要交通工具就係呢種叫 Shikara 嘅水上的士，每隻 Shikara 大約可以坐四個人，從湖上船屋到對岸 Boulevard Road 一程大約收 rs100 樓下，想平啲就要識講價。



我響台灣 backpackers forum 入面讀過一位樓主寫有關佢響印度經歷嘅 post，當中該位樓主曾經提到在達爾湖欣賞蓮花要到 Nehru Park 上船，而我所住船屋週圍亦可以見到很多蓮葉，所以相信我所住個位置應該係欣賞蓮花嘅其中一個理想地點。達爾湖每年大約七月尾至八月係蓮花盛開嘅季節，各位想到達爾湖賞蓮的話要就o岩時間出發。

我響達爾湖住嗰兩日發覺間間船屋個招牌都寫自己係 Deluxe Houseboat，但由於每間船屋都由本身屋主獨立經營，所以就算同一個旅行團，每個團友在不同船屋所享用到的設備同服務都可以有幾大差別。例如響我地間船屋招呼我地嘅主要係屋主、一位廚師、同一位小開；通常到食飯時間佢地至會出嚟招呼我地，其他時間唔多會響船屋入面出現，感覺比較家庭式。我同團有些船屋啲服務人員就著晒制服，船屋裝飾亦比較華麗；要再了解多啲嘅話不如等我先由間船屋個間格開始講起：

進入船屋大門後首先係客廳。我地個團有部份團友入住嘅船屋客廳有暖爐設施。當地嘅暖爐並唔係我地響香港用嘅電暖爐 (講開電又提提，當地電力供應非常之唔穩定，每晚都例必出現幾分鐘突然停電，所以去喀什米爾記得要帶個手電筒)，而係啲大大坐有條煙囪申出窗外以燒柴發熱嘅暖爐。我地間屋冇呢啲暖爐設施，於是屋主每晚都派個暖水袋比我地用。當時十月尾夜晚氣溫我估十度八度咁上下，用個暖水袋已經幾舒服，開暖爐反而會熱過頭。不過如果你係響一月到三月嚴冬季節去到，冇暖爐用到夜晚沖涼瞓覺嗰陣都會幾難涯。



客廳後面就係飯廳。我見過嘅所有船屋都係響個飯廳入面開單一張大飯枱嘅。即係話假如船屋有其他人入住，可能係外國人，可能係當地人，到食飯時間你便有機會要同佢地同枱食飯，分同一碟餸食。如果唔係太習慣的話便要事先同屋主商議其他安排。



跟住係睡房。每間船屋通常有三至五間睡房。好唔好彩我地入住間船屋所有房間只提供 double bed，攪到我要同我朋友孖舖。仲有船屋張地氈通常唔會有四五星級酒店啲咁乾淨，而屋主又好多時唔比你著皮鞋入屋，所以去喀什米爾另一樣記得要自備嘅就係拖鞋。



跟住係洗手間。我地個洗手間比較唔掂嘅都係塊厠所板。不過天氣凍同濕度唔高，都可以幫我快少少適應坐上去嘅感覺。比較我地個洗手間同我見到其他團友嘅，呢個洗手間算係中下質素。好一啲嘅個厠所板、浴盤、洗手盤都比較白淨；但我亦見過有間房響一個洗手間入面有一個坐厠、一個踎厠、再加一個尿兜，個感覺都幾核突。夜晚沖涼熱水供應基本上冇乜問題，不過落後地方以儲水式熱水爐供應熱水個水壓唔會大，我去嗰陣晚上氣溫有十度八度問題都唔係太大，但到二三月嚴冬時份如果間屋冇暖爐加上熱水水壓較弱，沖涼嗰陣我估會惡頂好多。



最後係伙食。我地間船屋早上多數 serve 麵包、俺列、炒蛋之類。中午比較豐富有飯有麵有菜有肉。肉方面當地人唔食得神牛，亦認為豬太污糟唔食得，所以主要係食雞同羊肉。我地個屋主比較孤寒，夜晚餐飯冇肉食要食齋，下面啲相就係我地其中一餐晚餐嘅菜式。因為我地離開喀什米爾嗰朝早去咗團友間船屋道食午餐，就親身試菜同跟團友傾談當中得知我地間船屋伙食方面算係比較差的一間；例如佢地每餐菜式都有菜有肉，烹調餸菜嘅味道亦比較出色。

響達爾湖住嗰兩日，本來想叫船屋屋主幫我地安排 Shikara 去一啲個團唔包但我地自己想去嘅地方。可惜屋主唔想同接待我地個團嘅當地 Agent 有利益衝突所以幫我地唔到。不過佢都好好人偷偷地比咗佢地船屋嘅卡片過我地，方便我地響出面叫 Shikara 番船屋，張卡片就咁跟埋我番咗嚟香港。

咁見屋主咁好人事就響呢道幫你賣個廣告啦 ~~ 如果各位計劃自己去又想同屋主格吓價嘅話，張卡片上面個聯絡電話或者幫到你。