Christchurch 基督城住宿篇 - 紐西蘭南島自由行

今次係基督城落腳嘅地方係一間舖號 The Old Countryhouse Backpacker 嘅旅舍，寫呢篇 Blog 時佢嘅 BPP rating 有80%。BBH 嚟講，網上一般意見係話，BPP Rating 有 80% 或以上嘅 BBH 居住環境通常叫做較好，BPP Rating 70% 或以下嘅就比較差。



呢次旅程住過六間旅舍，以我個人嘅標準嚟講，每間旅舍嘅睡房同床舖清潔問題都不大，啫話起碼冇話床舖一陣異味瞓到第二朝周身痕嗰隻。以今次經驗嚟講，啲旅舍咄事嘅通常都係厨房、洗手間浴室、同地毯幾個地方。呢間 BBH 個睡房就係咁嘅環境。



旅舍有 ensuite 同 shared bathroom 兩類 private room 嘅選擇，我住嗰隻係 shared bathroom 嘅 private room。



浴室洗手間都算乾淨企理，熱水供應亦都夠熱同充足，當然一個浴室幾房人用就一定冇 ensuite room 咁舒適方便。



厨房亦算寬敞，設備亦算齊全。就呢次旅程所見，唔係話個個旅客都咁好手尾用完個厨房會跟手洗番乾淨自己用過啲嘢；通常每日第二朝前旅舍都有人清潔個厨房一次。所以如果碰啱嗰日有幾批唔生性冇手尾嘅旅客用過個厨房，到中午夜晚時個厨房啲砂煲甖罉就有可能俾人搞到油冧冧污糟邋遢。我哋係 Dunedin 時就唔好彩碰到咁嘅情況 ~~；所以間旅舍俾人感覺乾唔乾淨，有時都好睇你好唔好彩碰著邊啲同屋。講番今次係基督城呢個厨房，算係乾淨企理用得舒服嗰隻。



呢間旅舍仲有個幾搞嘢嘅露天 Spa 同 Sauna。到步嗰日都見有團鬼妹著晒泳衣咁去浸。



總體嚟講我個人對呢間旅舍評價算中上，地方一般的乾淨企理，居住環境亦算舒適。