倫敦遊 - 大英博物館 大笨鐘 西敏寺 英國自由行

呢次倫敦遊行程第一個景點係 The British Museum 大英博物館，查實出發前我係完全冇預過會去呢度，不過朝早落機等過海關嗰陣同行朋友忽然話想行吓博物館，咁喺倫敦要揾博物館行嘅話第一個諗到嘅就係呢度。



大英博物館應該係我哋今次英國之行其中一個少有可以免費入場嘅景點。



嚟到英國其中一個令我相當之唔老黎嘅地方，就係呢度由倫敦呢啲大城市嘅一間教堂仔到一個荒郊野嶺冇乜特別嘅遺跡都要收費入場參觀，同之前去過幾個北歐國家比較，呢度劏遊客落力嘅程度算係劏得有啲過份。



我本人對睇博物館呢家嘢嘅興趣查實唔係好大，影吓相打過吓卡，到晏晝四點零鐘諗住循例過去行吓大笨鐘嗰堆景點就返住宿休息，此終第一日到步，剛剛搭完長途機 chur 唔到太盡。



我哋先由 British Museum 附近嘅 Tottenham Court Road Station 搭 Tube 去到 Westminster Station，一出車站就見到座笨鐘。



諗住過埋去西敏寺影張相打個卡，於是向住 Parliament Square Garden 行，又喺呢處國會廣場嘅草地停留一陣影吓相。



跟住去咗西敏寺門前影吓相打個卡，查實原本都有考慮過科水入去行吓嘅，不過差唔多晏晝五點先嚟到間嘢已經準備打烊。



喺西敏寺停留咗一陣，跟住向 Abingdon Street 方向行，途經 St Margret's Church。



行到呢度本身都諗住差唔多想返住宿度休息一陣晏啲再揾地方食晚飯嘅，點知剌激嘅事情就由呢一刻開始嘞 ～ 同行朋友發覺俾人打咗荷苞，唔見錢事少，最大鑊係唔見咗張 Debit Card 同護照 (好彩佢身份証分開放冇俾人扒埋)，於是我哋就要開始一段尋找 (補領) 特區護照之旅嘞。