我哋呢轉過嚟 Wanaka 只係夠時間走馬看花咁睇吓啲主要景點同食個快嘅午飯；Wanaka 嘅湖景係南島其中一個馳名嘅景點嚟；除咗遊湖逛商店，呢道亦有得玩各類水上活動同極限運動；夠時間嘅話係呢道留兩三日都唔會覺得悶。

呢日係今次紐西蘭行程嘅最後一日，晏晝三點咁上下就要揸番部車到達皇后鎮嘅機場還車，所以呢日只可以行吓皇后鎮附近嘅景點。朝早係旅舍食完早餐同 check out，之後就出車去呢日行程嘅第一站 ~ 箭鎮。

行完市集，我哋先過去 Mall Street 嗰邊行吓啲商店，之後行番過去 Nzone 間舖頭，一心諗住朋友起程之後再係附近行多陣，就出車去跳傘場地幫朋友影佢降落嘅一刻。可惜去到 Nzone 先知朋友預約咗嗰程跳傘因為風大取消咗；估唔到呢日咁好天個活動都會因為天氣嘅原因取消。

呢個 Creative Queenstown Arts and Crafts Market 係逢星期六係皇后鎮嘅 Earnslaw Park 開市嘅。同呢日上晝去嗰個 Remarkables Market 唔同，呢個市集冇季節性，一年四季只要當日好天冇落雨就有得過去行。

皇后鎮市中心地方查實唔係好大，呢日晏晝我哋係市內觀光全程都係步行冇揸車。

呢日朝早唔使趕時間，可以慢慢煮個早餐食完先出車，出發去今次旅程嘅最後一站，皇后鎮。去旅行嚟講，我個人其中一個最有興趣去嘅地方，就係當地嘅本土市集。所以計劃行程陣時，我都會專登留意一吓每個落腳點附近會唔會有啲又熱鬧又有本地特色嘅街市市集可以過去行吓。

係 Milford Sound 回程番 Te Anau 呢段路沿途查實有幾個好值得一去嘅景點。不過我哋出車離開 Milford Sound 陣時個天都仲係落住幾大雨；見個天氣咁差，大伙兒原本係諗住放棄唔去回程途中嘅景點，直接開車番 Te Anau 旅舍煮飯休息嘅。

之前一晚知道去 Milford Sound 條 Highway 因為大雨封咗路，嗰晚都幾擔心第二日預約咗去 Milford Sound 程船河有冇得成行。我哋當日預約咗嗰程船河開 11 點，我哋係 Te Anau 查實最遲 8 點幾鐘就要起程出發。

今次係 Te Anau 落腳嘅係一間叫 Bob and Maxine's Backpackers 嘅旅舍，下面個地圖就記低咗呢間旅舍嘅位置。

今早係我哋整個行程唯一一日冇係旅舍整早餐嘅一個朝早。一來係 Dunedin 住呢間旅舍個厨房的確係嘛嘛大伙兒都唔多想再係嗰道煮食，二來都想今朝早少少出車，希望去 Te Anau 之前可以係 Catlins 踩多一兩個景點。一早先去麥記食咗個快嘅，跟住就開車向 Catlins 進發。 係南島有段叫 Southern Scenic Route 嘅觀景路線，路程由 Dunedin 開始，經 Catlins、Invercargill、Te Anau 到 Queenstown。呢段觀景路線中有好幾個主要景點都係 Catlins 道。查實呢一日程路嘅目的地係 Te Anau，出發前已經預訂咗呢晚參觀螢火蟲洞嘅門票；預算好由 Catlins 去到 Te Anau 嘅行車時間後，呢日晏晝兩點前都可以係 Catlins 玩，玩到夠鐘就出車去 Te Anau；基於呢個預算下就一路行一路就住啲時間，睇睇呢半日可以行到幾多個景點。

離開 Sandfly Bay, 開車繼續向 Pilot Beach 進發。奧搭哥半島呢道有好多曲折多彎嘅道路，好多沿住海灣同山邊嘅路段仲要係冇欄杆圍住；我估如果夜晚天黑黑陣時渣車行呢啲路段應該都會幾有壓力吓；我哋今次行程就冇諗住係呢道留得太夜，但如果真係諗住入夜係呢道捕藍企鵝嘅話，我估就要考慮吓夜晚渣車行呢啲路段有冇問題嘞。

係香港住嘅我哋，平時接觸到海洋生態嘅機會，不外乎係去吓海洋公園睇吓嗰道啲受過晒訓練嘅海獅，又或者去睇吓啲住係水族館入面嘅動物。難得嚟到紐西蘭一趟，當然希望搵多啲機會睇吓當地嘅自然生態。今日晏晝係咁兒行過吓 Dunedin 市區，跟住我哋就出車踩去 Otago Peninsula，第一站先去 Sandfly Bay 睇睇。

今日想晏少少先去奧塔哥半島，希望夠運嘅話可以碰到啲比較早番歸嘅黃眼企鵝；所以去奧塔哥半島之前有少少時間，可以係 Dunedin 市區嚟個快嘅 city tour。而呢個 city tour 嘅第一站，先去呢條全球最斜大街 ~ Baldwin Street。

呢個旅程總共住過六間旅舍，係 Dunedin 入住呢間 Stafford Gables 係唯一一間俾我有中晒伏咁嘅感覺嘅一間旅舍。同幾可惜嘅係經營呢間旅舍嘅偏偏係一個識講廣東話同聲同氣嘅華人嚟。

今早嘅行程並唔趕，朝早可以慢慢煮個早餐，食完再收拾行理出車去今日嘅第一個景點，摩洛奇圓石。

根據小弟出發前嘅調查所知，係 Oamaru 睇企鵝有兩個熱點，一個係 Bushy Beach Road，呢道主要睇黃眼企鵝；另一個係 Waterfront Road，呢道就主要睇藍企鵝。下面個地圖就記低咗呢兩個熱點嘅位置。

到達 Oamaru 呢日係 12 月 31 日除夕，第二日 1 月 1 號係紐西蘭嘅法定公眾假期，呢日假期係紐西蘭係連超市都會關門大吉唔做生意嘅；為免呢個假期日去到 Dunedin 時搵唔到食，所以到步 Oamaru 後第一件事先去超市入貨，買定之後嗰日所需物資。

當我哋離開 High Country Salmon Farm 繼續去 Oamaru 嘅行程途中；開車行咗冇幾奈就係公路上發生咗段小插曲。查實呢段插曲都插得有啲戇居。話說我哋開車行行吓見到公路對面線有部車俾架警車截停咗；見到咁車上啲朋友就開始討論嗰架車到底發生咗啲乜事喇，當時我就搭咀話可能係嗰架車超速所以俾差佬截停抄牌都唔定喎。講到呢道我哋成車竟然冇一個人意識到提司機收油，就咁保持住個車速行咗幾分鐘，就有架警車追咗上嚟要我哋停車。

離開好牧羊人教堂，下一站上 Mount John，轉個角度繼續欣賞 Tekapo 嘅景色。Lake Tekapo 附近有兩條路上 Mount John，可以參考下面個地圖；一條係步行徑，起點係 Lakeside Drive，由嗰道上去來回聽講話要個零鐘咁上下；我未親身行過，真實要幾多時間就唔係太清楚嘞。

Tekapo 係聯合國教科文組織認定嘅其中一個國際星空自然保護區，去得嗰道就點都會期望可以有幸睇到當地呢個咁出名嘅星空。本來係 Mount Cook 行山睇見嗰陣時啲天氣已經打定晒輸數應該唔會有星星睇今晚可以早啲上床瞓覺；點乜知柳暗花明，番到 Tekapo 個天萬里無雲，今次又幾好運係旅舍休息到 9 點幾見個天差唔多入黑，大伙兒就擸架生出車，向好牧羊人教堂出發。

我哋大約 7 點零鐘番到 Tekapo，第一件事先番旅舍放低啲行理同醫肚。今次我哋入住呢間旅舍嘅舖號叫 Tailor-Made-Tekapo Backpackers 。因為我哋今日到達旅舍嘅時間真係幾晏，櫃位服務員已經放晒工。咁嘅情況下紐西蘭啲旅舍工作人員通常都會將辦工時間前番唔切旅舍 check-in 嘅旅客啲房門鎖匙寫番名同房號，就咁掛條匙係櫃枱當眼地方俾啲旅客自己拎。

大部份旅客去 Mount Cook 嘅活動都係玩健行睇風景。當地有好幾條健行路線，呢啲健行路線一般都唔係話太難行，大部份都適合男女老幼一家大細咁去玩嘅。據小弟出發前搵嘅料所知，Mount Cook 嘅健行路線有兩個主要起點；一個係 Aoraki Mount Cook Village 近 Terrace Road 附近，由嗰個位置出發可以行例如 Kea Point Track 同 Hooker Valley Track 等嘅路線。Kea Point Track 唔難行，應該只係一條來回兩個鐘頭咁上下，同主要係睇山景嘅路徑；Hooker Valley Track 就多啲嘢玩，沿途會經過兩條吊橋同終點係個有少少冰川睇嘅湖景；今次去 Mount Cook 本來呢條 Hooker Valley Track 係我嘅首選，但可惜後來發覺行呢條 Track 來回起碼要六個鐘；今次行程實在安排唔到足夠時間行呢條 Track，但行 Kea Point Track 齋睇山景又好似寡咗啲，於是我就決定去另一個起點，Tasman Valley Road 搵路行。

今日行程唔係太趕，可以朝早 8 點起身慢慢煮個早餐食完至出車。今日程車係呢個旅程中最長嘅一程，目標係 Lake Tekapo 同 Mount Cook。

未出發前搜集行程資料時一直搵唔到基督城市中心有超市，所以離開機場後第一站先去機場附近 Hornby 係 Chalmers Street 一間 Pak'nSave 買定第二朝早餐同晏晝嘅飲食。不過之後渣車去住宿處途中至發現，原來自己住嗰間 Hostel 附近有間 Countdown。番嚟香港後再上網搵，嗰間 Countdown 位置應該係 Madras Street 近 Moorhouse Ave。

今次係基督城落腳嘅地方係一間舖號 The Old Countryhouse Backpacker 嘅旅舍，寫呢篇 Blog 時佢嘅 BPP rating 有80%。BBH 嚟講，網上一般意見係話，BPP Rating 有 80% 或以上嘅 BBH 居住環境通常叫做較好，BPP Rating 70% 或以下嘅就比較差。

時間係 2013 年 12 月 28 日至 2014 年 1 月 6 日，地點係紐西蘭南島。今次年尾安排咗十日假期，去咗紐西蘭玩咗轉自駕遊。個行程由 9 月頭開始計劃；上網初步睇完一輪資料，決定今次先集中玩南島東岸嘅景點。咁玩的話行程起點同終點就離唔開基督城同皇后鎮兩處地方。有咗呢個大綱之後就開始訂機票。格完一輪價，到 9 月尾咁上下決定選用一間唔算大嘅 Agent 嘅一個機票連租車嘅 package。