峴港自由行 - Be Man 峴港海鮮大排檔

食完個下午茶我哋就返酒店房 Hea 多一陣，入夜之後就出街揾地方食晚飯嘞。



一場嚟到峴港就當然要食吓當地嘅海鮮喇，喺峴港沿住美溪沙灘旁邊嘅幾條街道，啫 Võ Nguyên Giáp Road 同 Hồ Nghinh Road 一帶 (準確位置睇上面地圖) ，都有好多海鮮大排檔，而當中有間舖號叫 Hải Sản Bé Mặn 嘅排檔，相信應該係網上最多人提過去過嘅海鮮排檔嚟。



我哋呢晚就幫襯呢間 Bé Mặn 食海鮮，去到揾到位坐低就先去檔口度揀海鮮，呢度每盤魚蝦蟹都貼咗張紙仔標示價錢。



呢次行程我哋大部份時間都可以同當地嘅越南人用英語溝通，不過喺呢間排檔點菜叫餸嗰陣發覺呢度啲店小二原來係完全唔識英文嘅，好彩重可以用普通話有限度咁同佢哋溝通，食過呢餐我先知道有啲菜名越南人嘅叫法同我哋好唔同，例如通菜原來佢哋係叫做空心菜。



呢餐我哋三個人埋單落樓就盛惠 VND 1,900,000，拉勻一位港幣兩嚿半有找，以香港嘅消費水平嚟計呢餐都算係抵食。



食完晚飯我哋就喺排檔出面截的士車我哋返酒店，呢日嘅行程亦就此完結。