河內火車街 . 聖若瑟主教座堂 St. Joseph's Cathedral - 河內自由行

第六日嘅行程，呢一日我哋上晝有些少時間可以喺河內市內打個白鴿轉，早上 11 點零鐘就要去到機場，準備搭晏晝兩點鐘班機過去峴港。

朝早喺酒店食完早餐，先去酒店櫃檯退房同擺低啲行李。


今朝可以俾我哋行街嘅時間好有限，所以我哋出門嘅時間都算早，行出街見到好多當地人都喺度食梗早餐。



呢個朝早我哋主要嘅目標係一條火車軌，呢條火車軌嘅位置大約就係喺一條叫 Phung Hung Street 隔籬。



呢條鐵路係喺越南嘅殖民地年代由法國嘅殖民地政府興建，到依家就由越南嘅國營鐵路公司營運。

呢段鐵路特別嘅地方，係佢穿梭於民居中嘅一條窄巷，住喺呢條窄巷兩旁居民，一行出屋企大門就好似企咗喺港鐵月台上嘅黃線後面一樣。


我哋喺條路軌上面行行吓見到有個火車時間表嘅水牌，見原來下一班火車差唔多時間駛到，於是就留多一陣睇埋火車經過嘅情景。



可惜嘅係，早幾個月衛報出咗段新聞，原來上年十月，河內政府出於安全考慮，決定封咗呢條鐵路唔俾遊客入去打卡。


如果依家喺河內想去睇吓呢條咁特別嘅火車軌嘅話，難度可能會比以前高好多。睇嗰篇報導講，我估封咗嘅應該係以前遊客最集中、開咗最多 Cafe 餐廳嘅嗰段路軌。


查實條路軌都好長，我估行遠些少嘅話應該重有出入口可以鼠到入去打卡嘅。


睇完火車，我哋順便過去附近嘅聖若瑟主教座堂 St. Joseph's Cathedral 行吓。


呢座聖若瑟主教座堂，又名河內大教堂。

係羅馬天主教河內總教區嘅主教座堂，大教堂從 1884 年開始興建，到1888 年完工。


行完教堂亦差唔多時間要回程返酒店，途中我哋專登經一經還劍湖睇多陣風景。


返到酒店拎返啲行李，跟住步行到附近嘅 86 號巴士站等巴士出機場。



出發之前我已經喺電話個地圖度記低咗巴士站嘅位置，我哋跟住電話個 GPS 地圖去到呢個巴士站。


望一望巴士站個水牌發覺竟然冇 86 號，不過又見到車站有人拎住啲大件行李喺度等梗車。


問一問佢哋又真係等梗車去機場，於是都放心企喺車站度繼續等。



都唔係等咗太耐就有巴士到站，呢程巴士到機場嘅第一站係 Terminal 1 國內線嘅離境大樓，亦啫係我哋要落車嘅車站，之後嘅一站就係 Terminal 2 國際線嘅離境大樓。