河內 36 古街夜市 - 越南河內自由行

擺低啲行李之後就又係躝街同揾地方食晚飯嘞，呢晚我哋就去咗試一試呢間舖號叫 Downtown Cafe & Restaurant 嘅餐廳。


坐低首先整返支河內啤降一降温。


呢間餐廳其中一道主打菜式係一隻叫 Bún chả 嘅越式烤肉米線，呢間餐廳會將啲烤肉、米線同其他配料用粉皮包成春卷。

呢度啲店小二好有心機，每一枱上咗菜之後都會細心同啲外地食客講解點包春卷。


食完飯跟住就係行夜街嘅時間嘞，河內 36 古街係河內舊城區一處著名嘅景點，據説 36 古街已經有一千年嘅歷史，傳說中喺古代嘅越南只有 36 種行業，古街嘅每條街道就售賣其中一種行業嘅貨品。


河內古街每逢星期五、六、日夜晚會封街開放夜市，呢個夜市嘅範圍大約係喺 Hàng Đào Street 到 Chợ Đồng Xuân (同春市場) 一帶，我哋呢晚剛好喺星期六返到河內，可以夜晚去一去呢個夜市揍吓熱鬧。


呢個夜市啲檔口似乎主要係售賣各式嘅乾貨，好似衣服手飾電話配件工藝玩意之類，感覺有些少似香港嘅女人街。


夜市嘅範圍都好大，嗰晚我哋都係行咗短短嘅一段冇認真行晒，以我哋行過嗰段嚟計就唔多覺有濕貨小食之類嘅檔口。


不過夜市四周嘅橫街都有好多其他店舖，當中都好容易揾到各式嘅食店。


我哋喺夜市一帶隨意咁四圍行吓睇吓啲舖頭，行吓行吓不知不覺就蕩咗返酒店門口，又見時候都唔早，於是就順道返酒店休息，呢一日嘅行程亦就此完結。