河內 . 還劍湖 - 越南河內自由行

食飯嚟講，出發前揾有關河內市嘅旅遊資料嗰陣見有唔少人介紹過呢間鋪號叫 Green Tangerine Cafe 嘅法國餐廳。越南本身係一個前法國嘅殖民地，一場嚟到整返餐法國菜亦係好合理同好合邏輯嘅，於是我哋喺越南嘅第一餐晚飯就嚟個法國大餐。

呢餐飯我哋三個人就食咗 VND 1,734,000，成百幾二百萬落樓，算係我哋喺越南呢咁多日當中食得比較豪嘅一餐嚟。



不過我個人就感覺呢間餐廳只係主力將啲心機放喺擺碟度，食味方面唔係話佢唔好食，不過水準只算係好一般嗰隻，以性價比嚟計呢餐飯唔算抵食。



食完飯我哋就向住還劍湖嘅方向行，諗住喺湖邊附近行一陣街先返酒店休息。



還劍湖係越南河內市中心嘅一個主要湖泊，原名綠水湖，後來因為一個同明朝有關嘅傳說而改咗家陣呢個名。



話說曾幾何時喺越南有條友個朵叫黎利，一日黎利得閒無事遊湖嗰陣碰啱有隻神龜送咗把叫順天劍嘅寶劍俾佢。



之後黎利就拿住把劍同當時明朝嘅駐軍開拖，打贏咗之後就建立咗後黎朝，成為越南嘅一代君主。



建國之後，一日黎利游湖嗰陣又見返隻神龜，佢將把劍還返俾人之後就順便幫個湖改埋名嘞。



大媽舞呢家嘢原來喺越南都相當之盛行，同屯門嗰班大媽不遑多讓，呢度嘅大媽一樣個個盛裝出席人人落力扭 pat 扭到 C 朗拿度都俾佢扭過埋嗰隻。





年紀比較大嘅多數一圍圍咁嚟跳大媽舞，年紀細啲嘅就似乎對跳老舞興趣不大。當中見到一班細路圍住檔賣一隻幾另類嘅層層疊，佢哋買咗就即場開砌就地表演。



大啲嘅有啲就玩踢毽，有啲就一圍圍玩花式跳繩，佢哋有啲會拎晒道具嚟跳，玩得相當認真。



除咗睇當地人玩民娛嘉年華之外，查實河內 36 古街部份嘅街道亦係喺還劍湖一帶，嗰度好多鋪頭都係賣各式名牌體育用品，特別係波鞋風褸同背囊之類，North Face、Nike、Super齋、Columbia 等等嘅名牌分分鐘可以係香港買到嘅十分之一價錢就有交易。



除咗河內，沙壩亦係越南另一個出名賣呢啲名牌體育用品嘅地方，事關我哋之後會喺沙壩逗留三晚，之後又會再返嚟河內留一晚，所以呢一晚我哋可以暫時按兵不動，只係睇吓河內呢邊大約賣梗乜價位，諗住之後比較返沙壩嗰邊啲款式價位之後先再出撃。



事關第二朝早要倒塔咁早起身搭巴士去沙壩，所以呢晚都唔可以行得太夜，差唔多行到 10 點我哋就回程返酒店休息。