越南沙壩自由行 - 沙壩 . 美食 . 餐廳

上回講過，之前一晚食晚飯發覺自己中咗伏嗰陣睇 TripAdvisor，見 Tuệ Tĩnh 街嗰頭啲餐廳嘅質素好似好啲，呢日下午茶我哋就一於過去呢條街試試。

查實嗰日睇 TripAdvisor 嗰陣我已經鎖定咗一間舖號叫 Sapa 24 嘅餐廳，間餐廳就喺 Tuệ Tĩnh 街口唔太難揾，食落呢間餐廳嘅餸菜無論賣相味道亦的確係比之前一晚嗰間醒神好多。


上菜之前見對面枱有人飲梗越南咖啡，於是我又跟機點返杯試吓，呢餐下午茶埋單就盛惠 VND 344,000，都算抵食。


填返飽個肚我哋就沿住 Tuệ Tĩnh 街繼續行吓，呢條街都有啲體育用品舖，我入咗其中一間舖見有件 North Face 嘅袋裝雨褸，又口痕同個老闆講吓價，最後 VND 200,000 講價講到 VND 160,000 成交。之後返到香港再去啲 North Face 門店格吓價，見啲差唔多款嘅原來都賣梗 HK$600 幾 $700。


又係講返之前一日睇嘅 TripAdvisor，除咗揾到嗰條 Tuệ Tĩnh 街有啲比較啱食嘅餐廳之外。


亦發現我哋住梗嗰間 Aira Boutique Sapa Hotel 嘅附屬餐廳原來啲食評都相當高分。


所以呢日我哋喺沙壩市行完街就返咗酒店休息吓，夜晚就直接落酒店嘅餐廳食晚飯。


喺自己住嘅酒店食飯其中一個好處，就係可以俾我盡情咁擸齊啲架罉認真咁同啲餸菜影相打卡。


呢餐飯我哋三個人落樓埋單就食咗 VND 1,580,000。

雖然都係今次行程中食得比較貴嘅一餐，不過同之前喺河內食嗰餐都算貴嘅法國菜比較，呢餐無論係啲餸菜嘅賣相、味道同性價比都較之前嗰餐優勝。