Cat Cat Village 貓貓村 . 沙壩 - 越南沙壩自由行

到第五日嘅行程，呢一日我哋會喺沙壩磨一個上午，到晏晝就要坐巴士返去河內。


呢日朝早啲天氣依然唔係好掂，我哋食完早餐出面重係落梗雨，冇計唯有喺酒店大堂行行企企等運到，好彩等咗大半個鐘啲雨終於停咗，可以俾我哋出去行吓。


呢一日我哋留喺沙壩嘅時間都幾有限，要揀個就近又易去嘅地方行，咁計其實都可以話冇乜選擇，一定係沙壩景點中最大路嗰個 Cat Cat Village 貓貓村。


由沙壩市中心去 Cat Cat Village 條路唔算太遠，經我哋之前一日食下午茶嗰條 Tuệ Tĩnh 街一路行到街尾，過晒啲店舖之後再行一段斜路，大約半個鐘步程就可以行到村入口嘅售票處。


因為去程呢段路基本上都係落斜，行起上嚟算係相當之輕鬆。


Cat Cat Village 成人嘅入場費盛惠 VND 70,000 一位，喺村口個售票站科水之後就喺隔籬入口落樓梯入場。


睇梯田嚟講，Cat Cat Village 入面嘅梯田查實唔係太可觀，當然某程度係因為之前兩日我哋去過 Ý Linh Hồ 同 Lao Chải，有得比較之下得出嘅感覺。


喺 Cat Cat Village 入面嘅梯田，基本上就係相入面一眼見晒咁多。


所以如果去沙壩睇梯田嘅話，建議唔好齋行完 Cat Cat Village 就當自己睇咗。


可能嘅話盡量約個當地導遊去一去類似 Ý Linh Hồ 同 Lao Chải 嗰類嘅行程，先可以睇到越南真正農村梯田嘅面貌。


喺呢個唯一嘅梯田景觀影完相，跟住沿住一條落斜嘅梯級行，梯階兩旁都係啲做遊客生意嘅店舖。


遠遠向下望就見到一個似主題遊樂園多過似村莊嘅地方。


Cat Cat Village 原本係沙壩市附近一個黑苗族嘅村落，不過今時今日呢個村莊已經商業化到過晒龍。


村入面依家全部都係啲專為遊客而設嘅裝潢。


沿途見到好幾個披上成副黑苗族傳統服飾嘅當地人嚟到玩 cosplay。


成個 Cat Cat Village 可以算係可觀嘅景觀大約應該係咁多。


我哋沿住離場嘅路徑一路行經過一座小型瀑布，之後就係一段上斜嘅山徑。


呢段山徑全程都係鋪平咗嘅石屎路，過咗入村嘅一條鐵橋之後再行冇幾耐有個停車場。


停車場有的士司機喺度打躉兜客，我哋就喺呢度上咗部的士返沙壩市。


返到沙壩市落車冇幾耐個太陽就出返嚟。


我哋先揾間餐廳食個午飯，跟住就返酒店拎返啲行李。


再揾櫃檯職員幫我哋叫部的士車我哋去 Sapa Express 嘅巴士站。


沙壩市啲的士都係跟咪錶計錢，明碼實價；由我哋住嘅酒店坐的士去 Sapa Express 巴士站嘅車費大約係 VND 50,000 左近，唔算好貴。


Sapa Express 由沙壩返河內呢程車，坐位同卧鋪喺沙壩市分別有兩個唔同嘅巴士站，上面個地圖就記錄咗呢兩個巴士站嘅位置。


同我哋早幾日嚟到沙壩市一模一樣嘅情景，巴士站依然係人頭湧湧。


我哋呢一日坐嘅係晏晝一點半出發去河內嘅巴士，同嚟沙壩嗰程巴士一樣，車程中途會停兩個休息站。


巴士到河內市之前會經一經機場停站，大約夜晚七點我哋就返到河內。