峴港自由行 - 峴港酒店住宿 Monarque Hotel Danang

我哋返到酒店拎返啲行李，喺香港出發前我已經喺部電話度裝定個 Grab App，呢次第一次喺越南試用呢個 App 約車返峴港。個 App 查實好易用，約車亦覆得好快，由我打開個 App 計真係唔使 5 分鐘約咗嗰部車就已經喺酒店門口等梗我哋，車資又明碼實價，出行峴港呢個實在係必備良 App。



由會安到峴港呢程車嘅車資就盛惠 VND 327,000，我哋大約晏晝 5 點到達酒店。我哋喺峴港入住嘅酒店舖號叫 Monarque Hotel Danang，經 Agoda 預訂，兩晚房租盛惠 HKD 1,892。



呢間酒店係我哋今次行程最後一個住宿據點，酒店房間相當闊絡。



床鋪毛巾浴厠都乾淨企理，全部可以放心使用。



呢間房重有個對正美溪海灘嘅無敵景觀。



酒店租金除咗包早餐外重包多一餐下午茶，我哋喺酒店房放低啲行李見冇乜其他世藝，於是就去餐廳睇吓個下午茶有乜嘢食嘞。



原來呢間酒店個下午茶嘅排場都搞得相當認真，老老實實呢個下午茶粗粗哋真係可以當午飯正餐咁食。



餐廳出面有個泳池，不過個泳池一來唔大二來冇遮冇掩咁對正餐廳，我喺酒店兩日都未見過有人真係喺呢個泳池度游水。