Horseshoe Bend 馬蹄峽灣 - 自駕巡遊美國西岸國家公園

開始我哋第四日嘅旅程，呢日嘅車程比較輕鬆，由 Flagstaff 出發去到目的地 Page 只係 130 英里嘅路程。



上面嘅地圖就記錄咗呢日我哋嘅行車路線同去過啲景點嘅位置，呢日我哋會去小鎮 Page 附近嘅兩個景點，Horseshoe Bend 馬蹄峽灣同 Upper Antelope Canyon 上羚羊峽谷。



查實呢兩個景點都係比較適合喺正午時份去睇嘅，如果唔諗住分兩日去呢兩個地方嘅話，咁就要做個取捨只可以揀其中一個地方正午去到。我大約出發前一個月先上網報羚羊峽谷嘅導賞團，嗰陣我所知嗰三間辦去上羚羊谷嘅旅行社嘅中午團都已經滿額，所以我哋都冇得選擇，呢日嘅中午只可以揀去 Horseshoe Bend。



我哋大約中午 12 點到達 Horseshoe Bend 對出嘅一個停車場，由呢個停車場落車要再行多廿零三十分鐘，先可以去到睇 Horseshoe Bend 嘅位置。



四月尾呢啲時間去到查實唔係好熱，防曬同帶水呢啲我個人就覺得唔係太需要，不過現場見到大大個電子告示牌提啲遊客小心中暑同記得帶夠水飲，我估過多兩個月真正天熱嗰陣嚟呢度行會辛苦好多。



行去 Horseshoe Bend 嗰條小徑雖然有部份路段係啲沙地嚟，不過整體嚟講我覺得呢段路唔算係好難行。



由停車場到峽灣嘅距離大約係 ¾ 英里，行到中段已經遠遠望到一個大大嘅峽灣地形，我哋大約行咗廿幾分鐘就到達馬蹄峽灣嘅崖邊嘞。

馬蹄峽灣 (Horseshoe Bend) 係科羅拉多河靠近亞利桑那州佩吉市 (Page) 嘅一個馬蹄形嘅峽谷嚟，呢個峽灣坐落於格倫峽谷水壩 (Glen Canyon Dam) 同鮑威爾湖 (Lake Powell) 嘅下游。睇景嚟講峽灣上陡峭嘅懸崖上方就係呢度最佳嘅觀景位置，懸崖上方嘅海拔高度係 4,200 英尺，而崖下嘅科羅拉多河海拔高度係 3,200 英尺，啫話如果一個唔覺意由最佳觀景位置嘅崖頂碌落去嘅話都要碌 1,000 英尺，啫大約係由中銀大廈頂樓度跳落嚟咁嘅高度。而馬蹄峽灣呢度的確曾經發生過有人碌落懸崖嘅致命意外。

喺 2010 年 7 月，一位 32 歲嘅希臘遊客因為企咗喺崖邊一處比較薄嘅砂岩上面睇風景，當時佢腳下嘅砂岩突然斷裂令佢失足跌落千尺下嘅懸崖結果瓜咗老襯，而呢單意外亦係馬蹄峽灣近十數年來唯一一宗有人喪生嘅致命意外嚟。



查實睇返崖邊嘅四周好多地方都係由呢類一層層嘅砂岩 (Sandstone) 結構所形成，崖邊好多地方都只係向外申出一塊薄薄咁嘅岩層，如果企正喺呢啲太薄嘅砂岩上面查實都真係幾危險吓㗎你咪話。



我哋比較細膽唔係好敢企喺崖邊上面影相 ，係崖邊啲比較安全嘅位置度行咗陣，見有度比較厚實嘅崖邊位置，我哋先喺嗰度爬喺地上面申部相機出去懸崖度嚟影。



嚟 Horseshoe Bend 欣賞風景同影相，一般嚟講中午係一日之中最理想嘅時段嚟，原因係峽灣底部嘅科羅拉多河四周都係被千尺高嘅崖壁所圍繞，如果太早或者太晏嚟到，朝早同黃昏嘅斜陽就會被崖壁所遮蔽而喺峽灣上形成陰影，峽灣上陰影同被陽光照射到嘅部份因為反差太大，手持相機影相嘅話就比較難喺咁嘅光線環境之下清晰地影到峽灣嘅全貌嘞。



喺去下一場羚羊谷之前要預返足夠時間食晏晝飯，我哋喺 Horseshoe Bend 呢度大約逗留到晏晝點零鐘，跟住就出車去 Page 度揾地方食飯嘞。