Horseshoe Bend ~ Antelope Canyon 住宿 ‧ La Quinta Inn & Suites Page at Lake Powell - 自駕巡遊美國西岸國家公園

喺 Page 呢一站我哋住咗間貴價少少嘅酒店，酒店舖號叫 La Quinta Inn & Suites Page at Lake Powell，經 Booking.com 預訂，一間兩張床嘅套房房租每晚盛惠 HK$ 970，俾貴少少嘅話查實可以四個人屈入一間房度嘅，不過我哋想住得寬敞啲所以租咗兩間套房嚟住。



呢間酒店由大堂到房間嘅裝修都非常之新淨，床鋪同毛巾都光潔雪白，呢間房係呢敞旅程中我哋住過最乾淨舒適嘅一間嚟。

浴廁亦係設備新淨，廁盤、浴室企缸、同洗手盤都打理得雪白潔亮。



今次行程我哋只係住過兩間包早餐嘅住宿，而呢間就係其中一間，呢度包嘅早餐唔算係好豐富，主要都係幾款包類、粟米片、牛奶乳酪同少量肉食生果嘅選擇。



原本諗住呢類酒店格局嘅住宿入房嗰吓都要科一兩文美金貼士俾啲服務生嘅，不過呢邊啲酒店好似唔興呢味嘢，呢一站同下一站喺 St George 嘅酒店都冇服務生同我哋搬行李，可以慳返幾草嘢貼士錢。