Los Angeles 住宿 ‧ Small & Cozy Home - 自駕巡遊美國西岸國家公園

我哋第一站喺洛杉磯落腳嘅民宿係呢間位於卡森 (Carson) 嘅 Small & Cozy Home，民宿係經 Airbnb 預訂，房租一晚盛惠 HKD 1,120 大元。



呢間屋有三間睡房三張床加一個大廳，有獨立廚房同浴廁。



屋本身嘅家俬同裝修都唔算係好新淨，乾淨嘅程度就算係中規中矩咁喇。



廚房啲架生都算齊全，不過就要件件洗過吓先用得。查實今次行程用過好幾個民宿嘅廚房，發覺美國民宿啲廚房嘅廚具一般都唔會洗得好乾淨，啲砂煲罌罉大部份都要先洗乾淨先可以放心使用。



間屋個洗手間就比較細，乾淨程度都係中規中矩嗰隻喇。



睡房被鋪同毛巾目測就睇唔到有明顯污漬嘅，不過手感摸落，特别係啲床鋪，感覺上真係唔似洗過。今次旅程住過咁多間民宿，發覺揀屋嗰陣有樣嘢係幾値得注意一吓嘅，就係間民宿啲床單同毛巾嘅顔色。如果間屋係用啲深色嘅床鋪嘅話，咁就有可能係個屋主想用啲襟污糟嘅顏色搏大霧，未必每一手客都會換過啲洗過嘅床單。今次旅程我發覺床單嘅深淺色的確係一個幾有參考價值嘅指標嚟，啲肯用白色床鋪同毛巾嘅民宿一般都真係會傾向比較乾淨。