Death Valley 住宿 ‧ Near Death Valley - 3 Beds 2 Baths Home - 自駕巡遊美國西岸國家公園

呢晚我哋喺小鎮 Pahrump 落腳嘅係呢間 Near Death Valley - 3 Bed/ 2 Bath Home，Pahrump 係 Death Valley 附近一個叫做大啲啲嘅小鎮，喺呢個鎮住一晚主要係想揾個就近嘅地方留宿，方便之後嗰日可以近啲出車去 Death Valley。



呢間民宿係經 Airbnb 預訂，有三間房，其中一間房係連浴室套廁。



大廳出面另外有個浴室，有個都幾闊絡嘅廚房，房租一晚就盛惠 HKD 1,343 大元。



睇得出呢間屋嘅屋主真係好用心佈置到間屋靚一靚咁去招呼啲住客， 成間屋由大廳廚房到睡房浴室表面上都打理得相當之企理。



不過間屋有好多細節位查實都係有啲唔係太掂，首先主人套房入面有一塊玻璃櫃門係甩咗出嚟唔拉得嘅。



另外主人房個浴缸查實已經俾上手整塞咗去唔到水，屋主已經留咗字條提我哋個浴缸唔用得只可以用隔籬個企缸沖涼。



不過呢個都係少問題對我哋影響不大，此終呢類民宿嘅浴缸就算用得我哋都唔會真係隨便坐落去浸喇。



另外呢間民宿供應嘅毛巾我聞落硬係覺得好似輕輕有啲異味咁，都係嗰隻表面上睇唔到肉眼見得到嘅污漬，不過摸落硬係唔覺係放過落洗衣機洗過嘅感覺咁。



到去巡個廚房嘞，呢個廚房啲廚具就認真係嘛嘛，個廚房表面一眼睇得到嘅地方例如枱面洗手盆之類都算係乾淨嘅，不過啲砂煲罌罉就此終都唔係好掂，啲水煲同鍋具用手指輕輕揩吓都成個手指印出晒嚟，啲廚具全部都要好認真咁清洗一次先可以用。不過都公平啲咁講返句，以我哋今次美國之行喺呢啲價位所租過嘅民宿嚟講，大部份嘅廚房查實都係咁上下嘅水準，個廚房啲廚具乾唔乾淨我估都好睇上一手嘅住客生唔生性。