Death Valley to Yosemite 住宿 ‧ Whispering Meadows Apartments - 自駕巡遊美國西岸國家公園

呢間民宿舖號叫 Whispering Meadows Apartments，經 Booking.com 預訂。



房租一晚盛惠 USD 196。除咗房租之外，喺入住嗰陣佢哋要另外收取 USD 150 按金，呢筆按金收取同退還都係經信用卡以美元交易，對返港幣入數之後，一來一回就多咗 HKD 45 咁上下嘅匯差使費。



呢間民宿有兩間房，其中一間有一張大床同一個套廁，另一間房有兩張床。



廳外另有一間浴廁，床舖同毛巾都算幾乾淨，論被鋪同毛巾嘅清潔嚟講呢間屋算係合格。

廚房嘅用具基本上算係乾淨，起碼啲杯碟鍋具拿上手都冇乜油膩污漬；不過間屋好多易潔鍋都有好明顯嘅花痕，後來返到香港之後我喺 Booking.com 度留咗評論提返個業主，個業主都好快回覆話會更換返啲花咗嘅鍋具。



我哋嗰晚入屋嗰陣見間屋大門上面織咗個幾大嘅蜘蛛網，好多昆蟲就喺個蜘蛛網周圍飛嚟飛去，雖然只要出入嗰陣快手關門唔好俾啲昆蟲飛入屋查實問題都唔係好大嘅，不過出入嗰陣望見度門個感覺的確係有些少核突。我估應該係因為間屋喺大門上面裝咗一棧幾光亮吓嘅大燈，到夜晚啲飛蟲被燈光吸引圍住度門嚟飛，繼而再吸引啲蜘蛛喺門外結網。不過到底個蜘蛛網係喺一夜之間結成，定還是係已經喺度門上織咗好耐又冇人去清理，咁就不得而知嘞。