Sequoia National Park 美洲杉國家公園 ‧ General Sherman Tree 薛曼將軍樹 - 自駕巡遊美國西岸國家公園

開始我哋呢次美國之行第八日嘅行程嘞，呢一日我哋嘅行程比較簡單，主要喺揸車駛向呢晚嘅落腳點優勝美地國家公園，途經美洲杉國家公園 Sequoia National Park 會盡量爭取時間入去行吓。



上面個地圖就記錄咗我哋呢一日嘅行程路線。是關之前嗰日嘅行程比較 Chur，所以呢日我哋就安排遲少少出門，朝早十點先出車，出車嗰陣見民宿個接待處前面擺咗好多臨時檔攤，我估可能係附近社區搞嘅假日舊物跳蚤市場都未定。



大約晏晝一點我哋就經 Ash Mountain Entrance Station 進入 Sequoia Park 嘞，喺呢個網址度可以揾到 Sequoia Park 唔同組合嘅入場收費，我哋因為已經揸住張 American the Beautiful Pass 所以唔使另外俾錢可以就咁憑 Pass 入場。經呢邊路入到國家公園，首先例必會喺 Tunnel Rock 停一停影張相喇，喺呢嚿大石側邊有條小徑可以行到上嚿大石上面影相，咁嚟到嘅遊人就個個都會行上去擺吓鋪士嘅。

Sequoia National Park 成立於 1890 年，呢度係美國創立嘅第三個國家公園嚟，顧名思義嚟到 Sequoia National Park 當然主要係想睇吓呢度嘅參天巨杉喇。

呢度有好幾棵大杉木都係有名有姓嘅，我哋喺 Giant Forest 附近一個停車場泊好部車，之後去洗手間嗰陣就經過見到呢棵叫 Sentinel 嘅巨杉。

查實我哋呢一日喺 Sequoia Park 可以逗留嘅時間非常之有限，只可以快閃睇過吓啲重點就要走人，所以落車之後就先行去睇呢個國家公園最重嗰個重點 ~ General Sherman Tree。

薛曼將軍樹 General Sherman Tree 係目前世界上以體積計算最巨大嘅樹木，通常亦被認為係世上最巨大嘅生物嚟；呢棵樹高 83.8 公尺，底部最大直徑達 11.1 公尺。

我哋參見完將軍已經係晏晝三點，之後我哋行返去停車場揾個位食個自備嘅午餐，嚟之前我重諗住可以去行埋附近嘅 Moro Rock 先至走人嘅，不過到呢個鐘數已經比我原先預計離場嘅時間遲咗，所以一填返飽個肚我哋就要快快出車離場嘞。

我哋原路經 Ash Mountain Entrance Station 離場，首先去附近一個比較大嘅市鎮 Fresno 揾超市上貨，事關之後我哋會喺 Yosemite Park 園區內住宿兩晚，喺園區內買嘢比較貴同冇咁多選擇，所以我哋盡量想喺入園區之前買齊嚟梗呢兩日所需要嘅糧餉。同之前喺 Death Valley 離場嗰晚一樣，呢晚結果我哋都係喺時間上失咗預算要入夜後揸車；入夜後喺優勝美地園區入面嗰段漆黑一片嘅山路行車查實都有少少嚇人㗎，好彩最後我哋都無驚無險達陣，大約夜晚十點終於到達我哋呢兩晚喺優勝美地落腳嘅民宿。