Mike O'Callaghan - Pat Tillman Memorial Bridge ‧ 麥克奧卡拉漢 - 帕特提爾曼紀念大橋 - 自駕巡遊美國西岸國家公園

查實出發前我哋根本冇留意到有呢個可以睇到胡佛水壩全相嘅位置，都係我同行啲朋友喺水壩上面行嗰陣睇到有個介紹呢條橋嘅水牌。



我哋再查吓地圖先知有個咁嘅位置可以揸車上去睇風景。



由水壩遊客中心嘅停車場出車，只係幾分鐘車程就到達大橋西岸一個免費嘅露天停車場，我哋泊好部車之後經一條步行徑，行幾分鐘就可以上到呢座大橋。



Mike O'Callaghan - Pat Tillman Memorial Bridge 係位於胡佛水壩下游位置一座橫跨科來拉多河嘅拱橋，大橋於 2010 年通車。



呢項工程係 Hoover Dam Bypass Project 嘅一個重要環節，目的係將以往跨越科來拉多河嘅道路需求由胡佛水壩頂嘅公路分流到呢座大橋上，以改善附近 93 號公路嘅交通狀況。



呢座大橋係以美國兩位著名人物命名，Mike O'Callaghan 係第 23 任嘅內華達州州長，而 Pat Tillman 佢曾經係一名 NFL 嘅美式足球職業球員。



Pat Tillman 喺佢完成 2001 年球季嘅賽事之後就放棄咗高薪嘅職業球員合約，喺美國 911 恐怖襲擊事件發生咗 8 個月之後參軍。



2004 年 Pat Tillman 喺阿富汗一次任務中被己方嘅炮火錯誤擊中，頭部被擊中三槍而陣亡。

呢件事最初係被報導成 Pat Tillman 因被敵方嘅炮火所擊中而陣亡，後來事件嘅真相被揭發，Pat Tillman 嘅家人同公眾都曾經質疑美軍部份高層為咗保存美軍嘅聲譽而企圖隱暪事件嘅真相。Pat Tillman 嘅事跡令佢成為美國一位著名嘅英雄人物，喺 2004 年一次紀念活動中，當時嘅內華達州同亞利桑那州州長就宣佈大橋以佢嘅名子嚟命名。



大約晏晝三點幾我哋喺大橋上面影飽相同開始覺得肚餓，於是就出車返去 Vegas 附近嘅唐人街揾地方食晏嘞。



呢條唐人街啲餐廳嘅選擇都好多吓，中式美式日式泰式都好易揾到，我哋落車巡咗陣就決定幫襯呢間 Phở Little Salgon 食越式河粉。



食完晏跟住我哋再出車揸多兩個鐘車程，大約黃昏六點幾就到達我哋呢日喺小鎮 Pahrump 落腳住宿嘅地方。



入屋放低啲行李，hea 咗一陣跟住出車去附近揾地方食晚飯，呢晚我哋就去咗呢間 Ohjah Japanese Steakhouse Sushi 食日菜。



喺 Death Valley 附近都係啲冇咁繁榮同比較寧靜嘅小鎮，喺呢啲鎮仔度住有個好處就係附近一帶嘅光害比較少。



撞啱喺啲天晴嘅日子嚟到嘅話就可以把握機會試吓影個有美國小鎮特色嘅夜景。



影完夜景就要快快手去沖涼瞓覺，養精蓄銳準備我哋之後一日喺 Death Valley 一個都好 chur 吓嘅行程。