Lower Yosemite Trail 下優勝美地瀑布 - 自駕巡遊美國西岸國家公園

開始我哋喺 Yosemite Park 第二日嘅行程嘞，呢日我哋諗住喺園區留到中午，食完晏晝就出車離場去下一站我哋喺三藩市落腳嘅民宿。之前一日行山行得比較 Chur，所以呢一日我哋諗住玩得 Hea 些少，朝早十點先收拾行李上車離開民宿。

呢日係星期一本來諗住 Yosemite Valley 嗰邊應該冇噚日咁多人喇，點知去到見到依然係泊滿晒車，我哋都要兜咗一陣先至揾到車位。



呢個朝早我哋留喺園區嘅時間有限，所以都係諗住揾個易去啲嘅景點行吓就算，泊好部車之後我哋就沿住 Lower Yosemite Fall Trail 行去睇瀑布嘞。

優勝美地瀑布 (Yosemite Falls) 係加州最高嘅瀑布，亦有一啲爭議話佢係美國同北美洲落差最大嘅瀑布嚟；呢座瀑布總高度為 739 公尺，一共分為三段。

最高嗰段係 440 公尺高嘅上優勝美地瀑布（Upper Yosemite Fall)，喺上下兩段瀑布之間嘅落差區，有幾個小潭，一般稱呢一區為湍流區（Middle Cascades)，呢一區嘅高度就有 206 公呎。而下優勝美地瀑布 (Lower Yosemite Fall) 高度係 98 公尺，我哋就係沿住一條相當容易行嘅步道 Lower Yosemite Trail 行去睇呢段嘅瀑布。

我哋喺初春時份去到 Yosemite，呢個季節園區裡面差唔多所有河流同瀑布都係處於激流澎湃嘅狀態，Lower Yosemite Fall 亦唔例外，我哋去到瀑布底部嘅一條步道嗰陣都係周圍水花四濺好似落梗大雨咁，我用咗兩秒鐘時間撳咗三吓快門就已經淋到部相機濕晒。

離開瀑布之後我哋再沿住 Eastern Trail 行返出去 Northside Drive 嘅大路，呢條步行徑側邊就係優勝美地溪 Yosemite Creek，呢條溪流向南連接 Merced River，亦啫係我哋之前嗰日行 Vernal Fall 同 Nevada Fall 嗰陣沿途經過嘅嗰條河流嘅下游。

我哋行到返去 Northside Drive 泊車嗰個停車場已經係晏晝一點，見都唔多夠時間行多個景點，於是我哋就喺附近揾個地方刨埋個自備嘅午餐，跟住就出車離場向下一站三藩市進發嘞。



我哋由 Yosemite Park 去 San Francisco 嘅話，原本最近嘅路線應該係經西面 Big Oak Flat Entrance 離場嘅，不過出發前查過呢個出入口會喺冬季封路，雖然我哋去到 Yosemite Park 嗰陣曾經問過園區嘅詢問處得知呢段路已經解封，不過此終唔多肯定嗰邊啲路況，所以就算兜遠少少都好，我哋都係照原定計劃嘅路線經 Arch Rock Entrance 離開園區。



跟住就係一程差唔多四個鐘嘅車程，上面個地圖就記錄咗我哋呢程車嘅路線同呢一晚我哋去過一啲景點嘅位置；車程中途我哋喺一個叫 Modesto 嘅城鎮停咗一站攤抖吓，到晏晝六點幾我哋就到達喺 San Francisco 落腳嘅民宿嘞。