Vernal Fall ‧ 弗納爾瀑布 @ Yosemite National Park - 自駕巡遊美國西岸國家公園

開始我哋喺 Yosemite Park 第一日嘅行程嘞，我哋呢日諗住行一段有少少 Chur 嘅山徑去睇兩個瀑布 ~ Vernal Fall 同 Nevada Fall；之前嗰晚比較夜先至到達民宿，所以呢日我哋諗住瞓晏些少，到朝早 10:00 先出車。

呢一日係星期日嚟，園區入面非常之旺場，入到去見到好多地方啲車位都泊滿晒車，好彩我哋喺行程起點附近嘅 Happy Isles Trail 揾到個爛地停車場有車位。



泊好部車之後就開始呢日嘅行程嘞，下面個地圖就記錄咗呢日我哋行過幾條山徑嘅路線。我哋由停車場出發，先沿住 Upper Pine Campground 則邊一條 Bike Path 行去 Happy Isles Trail 嘅 Trailhead。



今次呢個地圖同之前記錄行車路線嘅地圖有些少唔同，呢個地圖記錄嘅查實係 Yosemite Park 入面幾條主要行山徑嘅路線圖資嚟，呢啲圖資係由呢個網站所連結嘅地圖度匯出再下載成 KML 檔案，之後就可以再將啲 KML 檔案匯入返自己部電話入面嘅離線地圖度使用。



喺呢個網站度除咗可以下載 Yosemite Park 各條山徑嘅路線之外，另一個值得注意嘅資訊就係各段山徑嘅難度 (Difficulty)、同風景優美度 (Scenery Factor)，啫簡單啲咁講係嗰段山徑嘅性價比。今次我哋選擇去行嗰段 Mist Trail 嘅性價比查實都唔錯㗎，Scenery Factor 靚到爆燈，而 Difficulty 嚟講，行完之後我覺得呢段山徑應該已經係我個人能力嘅極限，個列表入面紅色 Difficulty 啲山徑嘅難度應該已經係超出咗我個人能力嘅範圍嘞。



我哋由 Happy Isles Trail 嘅 Trailhead 沿住 Merced River 一路行一路影吓相睇吓風景咁，大約去到 Sierra Point 附近嘅位置，就開始全段差唔多一路都係上斜嘅路段。



我哋係喺四月尾嚟到 Yosemite Park 嘅，雖然呢個時候 Yosemite Park 都有好幾條路因為積雪重係封咗路未開通返。

不過我哋喺 Yosemite Valley 嗰陣已經唔係太凍，基本上一件長袖上衣已經夠暖。



到我哋喺 Vernal Fall Trail 開始 Chur 啲上斜路段嗰陣，就已經熱到想連身上嗰件短袖 T-裇都除埋出嚟 。

沿住 Merced River 上斜呢段路四周嘅景色都唔錯，我哋喺初春溶雪嘅呢段季節嚟到，所以幾乎所有見得到嘅溪流瀑布嘅水流都係非常之咁澎湃。



大約 Chur 咗半個鐘嚟到一條橫過 Merced River 嘅石橋 Yosemite Falls Bridge，嚟到呢度我先開始察覺到周圍原來咁多人，個旺場嘅程度同旺角啲行人專用區真係有得比。

之後一段行上去瀑布頂嘅石級路比較狹窄，上石級嗰陣迎面一條落山嘅人龍，後面又一條上山嘅人龍。



啲石級路本身又濕滑難行，途中有時想停一停步快手影張相都會覺得唔係幾好意思驚阻到人 。

接近瀑布嗰段路啲水花都好勁吓，感覺同落梗大雨差唔多，我拎部相機係咁兒撳兩吓快門個鏡頭已經滿佈水點 。



不過有水花就代表有機會睇到彩虹，今次重嚟個雙彩虹擺喺個瀑布前面，咁就濕一濕身都冇乜所謂喇 。

喺 Vernal Fall 瀑布下面查實係一個叫 Vernal Fall Pool 嘅水池嚟，我哋喺初春溶雪季節嚟到。



呢段季節喺 Yosemite Park 啲瀑布嘅流量比較勁，所以完全睇唔到瀑布下面係乜環境。

不過如果到夏季嘅季尾嚟到，Vernal Fall 嘅流量會細好多，到時應該有機會見到有人喺瀑布下面嘅水池度游水。



不過瀑布下面水深得嚟水温又低，加上岸邊嘅石頭又非常之咁濕滑。

所以喺 Vernal Fall Pool 落水之後要上返水會有一定困難，呢度過往亦曾經發生過泳客遇溺要驚動到園區嘅 Ranger 去救援嘅事件。



我哋大約晏晝一點半上到 Vernal Fall 嘅上游頂部，喺上游呢度嘅 Merced River 旁邊有一片比較平坦嘅石地。



Chur 完一段咁嘅山徑 ，大部份遊人嚟到呢度都會停一停步坐吓撚吓松鼠稍作休息，回一回氣先至繼續行程。