亞維農 Avignon 住宿 ‧ Le Mas Vieux - 從法國南部走到瑞士

我哋喺 Avignon 呢一站因為可以自駕嘅關係，住宿嘅位置選擇自由度比較大，唔一定要住近市中心。呢間民宿嘅鋪號叫 Le Mas Vieux，經 Booking.com 預訂，兩晚租金包埋早餐盛惠 EUR 296。



上面個地圖就記錄咗呢間住宿嘅位置。



呢間民宿係由一座修道院改建而成，所以成間民宿由建築物嘅外觀到室內嘅裝修間格都好特别，比起租住一般嘅民宅又係另一番完全唔同嘅體驗嚟。



睇得出屋主好有心機佈置屋外嘅亭園，除咗啲花花草草之外，呢度重有個幾企理嘅泳池。



住宿嘅客廳有個開放式廚房同擺咗張單人床，不過廚房啲煮食用具並冇駁電唔用得。民宿有一個公用廚房，我哋入住嗰兩日我估間民宿應該唔係好多客人入住，住喺度兩日都冇人同我哋爭廚房用，所以呢兩晚我哋都係用佢個公用廚房煮食。

客廳樓上有層閣樓擺咗張雙人床，住宿嘅洗手間床鋪毛巾都都打理得幾乾淨，可以放心使用。