Baie Des Anges Nice 尼斯 ‧ 天使灣 - 從法國南部走到瑞士

我哋喺 Nice 呢度只係短住一晚，所以喺住宿度放低啲行李之後就要把握晏晝剩返嘅時間去行一行呢個著名嘅城鎮。



我哋由住宿處嘅 Place Massena 起行，先向住舊城區嘅方向前行。



途中經過一個噴泉廣場，成個廣場都係啲小朋友喺度玩水嬉戲。



繼續向住舊城區嘅方向前進，先行吓舊城區一帶嘅店鋪。



Nice 係一個旅遊渡假嘅勝地，舊城區呢邊啲店鋪自然係主力做遊客嘅生意喇。





行返出舊城區之前，經過 Cathedrale Sainte-Reparate 尼斯主教座堂，本來係想入去 Hea 一陣嘅。



可惜剛入到去行咗兩步，入面啲職員就同我哋講話教堂要清場準備收工。



離開主嘅懷抱之後，我哋就向住海邊、啫係天使灣嘅方向前進嘞。



天使灣 Baie Des Anges 之所以叫天使灣，係因為海灣嘅海岸線離遠望落就好似天使嘅翅膀一樣。



海灘旁邊係一條叫做 Promenade des Anglais 英國人大道嘅行人道路。



沿住呢條行人大道一路吹住海風一路欣賞 Nice 著名嘅海旁景色，感覺相當舒服。



香港嘅海灘一般都係沙灘，而 Nice 呢道嘅天使灣就係一個滿佈小石春嘅石灘嚟。



呢度唯一有沙嘅地方，應該就係英國人大道旁邊嘅幾個沙灘排球場。



喺英國人大道同對出嘅 Quai des Etats Unis 大道兩邊都有唔少餐廳酒巴，三五知己可以一邊喺度飲嘢吹水，一邊欣賞尼斯嘅海旁美景。



我哋喺英國人大道一路 Hea 吓一路影吓相，剛啱碰到一隊遊行隊伍。



呢班人應該係襯假日出嚟宣揚一啲海洋保育之類嘅議題 ~ 好似係，除非唔係。



晏晝五點幾，見再向前行都唔多似有乜特别嘢睇，於是回頭行返去城堡公園嗰邊。



要欣賞天使灣嘅全景，城堡公園 Parc du Château 應該算係天使灣一帶其中一個最佳嘅觀景位置嚟。



下面個地圖就記錄咗城堡公園嘅位置。



由沿岸海灘嘅位置上去城堡公園有兩個途徑，一係就行樓梯上、一係就搭𨋢。



我哋嚟之前已經坐咗日幾一程長途機，冇乜點休息過就出咗嚟躝咗半日街，如果要 Chur 呢條咁高嘅樓梯上去觀景台嘅話老老實實真係未必頂得順。
好彩我哋去到嗰陣部𨋢重未收工，後來返到香港我試試上網睇吓揾唔揾到呢部𨋢嘅開放時間，對過啲資料，相信呢部𨋢應該喺每年冬天 10 月 1 日到 3 月 31 日開到黃昏六點，喺夏天就每年 4 月 1 日到 9 月 30 日開到黃昏八點至收工。



我哋喺城堡公園睇完個日落就行樓梯落返去海灘嗰邊，沿住 Quai des Etats Unis 近舊城區嗰邊，一入夜啲餐廳就會喺佢哋門口露天嘅位置開枱招呼客人做生意。



我哋行過呢排露天餐廳就順便是但揾咗張枱坐低食埋個晚飯先返歸休息。