西庸城堡 Chateau de Chillon - 瑞士自由行之旅

行程摘要 :
Lanusanne => Montreux (Train, Free with Swiss Pass),
Escaliers de la Gare => Veytaux Gare (Bus Route 201, Free with Swiss Pass),
西庸城堡 Château de Chillon (Free Entry with Swiss Pass)

到行程嘅第五日，今日朝早我哋會先搭火車去 Montreux 站會合我哋今次行程嘅第四位團友，跟住去西庸城堡 Hea 個上晝之後再出發去下一站 Zermatt。

未出發去睇城堡之前，我哋先要喺火車站放低啲行李以便輕裝上路。喺瑞士唔係個個火車站都有行李寄存箱，所以如果嗰日嘅日程當中係有需要寄存行李嘅話，最好就係預先上 SBB 嘅網站對一對邊個車站有行李寄存服務。



Montreux 應該係最近西庸城堡而又有行李寄存服務嘅車站，瑞士火車站嘅行李寄存箱冇得段鐘計錢，開個大箱盛惠 CHF 9，成嚿水港紙只可以免強放到兩隻中篋，喺瑞士寄存行李查實都幾肉赤。



喺 Montreux 火車站過一條馬路有一個叫 Escaliers de la Gare 嘅巴士站，由呢個站上巴士坐八個站去到 Veytaux Gare 站，喺嗰度落車行兩步就係西庸城堡。



西庸城堡就座落喺 Lake Geneva 嘅湖邊，未入去參觀之前我哋先喺湖邊睇吓風景影吓相。



呢度入場費盛惠每位成人 CHF 12.5，我哋揸 Swiss Pass 嘅可以喺入閘櫃位免費換飛入場。





西庸城堡 Château de Chillon 位處日內瓦湖湖畔一塊巨大岩石上，據説係瑞士最受遊人歡迎嘅歷史建築，每年有超過三百萬人次嚟到呢度打卡。





Chillon 喺法文中係解作 “石頭”，可能呢座城堡所座落嘅嗰塊凸出湖岸嘅巨岩就係 Château de Chillon 呢個名稱嘅由來都唔定。

西庸城堡曾經係權傾朝野嘅薩瓦公爵家族 (Dukes of Savoy) 嘅夏宮，蕯瓦公爵家族由 12 到 16 世紀呢數百年間喺呢度控制咗日內瓦湖嘅船運交通，而西庸城堡就成為佢哋喺呢度嘅軍事要塞同司法機關。



呢一日查實我哋都唔係有好充裕嘅時間詳細參觀呢個地方，我哋喺城堡低層嘅外圍行咗陣，跟住就向比較高嘅樓層進發，想喺離場之前先揾到嗰個可以俯瞰呢座城堡周邊同日內瓦湖嘅樓頂位置。



上去呢座樓頂之前經過一個武器室，展覽咗以前呢度嘅將士所使用嘅兵器。





喺樓頂度有兩排石窗，可以居高臨下咁俯瞰城堡南北兩個方向嘅湖景。



到中午十二點幾鐘，我哋就離場坐巴士回程返去 Montreux 嗰頭揾地方食晏。