Street Festival in Grindelwald - 瑞士自由行之旅

返到 Grindelwald 第一件事先揾吓邊間餐廳合眼緣可以入去開飯，查實之前一日行過呢檔北歐明爐燒味，已經覺得呢檔嘢啲出品嘅賣相好吸引，於是呢一晚我哋就入去試吓。

食梗飯嗰陣我留意到鋪頭出面忽然間擺多咗好多枱枱櫈櫈，初時我以為可能入夜條街冇乜車行，啲鋪頭老闆咪喺鋪頭門外放多幾個位做多幾個錢生意咁啫冇乜特別。



到我哋食完飯行返出鋪頭先發覺 Dorfstrasse 成條街都封埋，嗰陣我哋重搲晒頭諗梗發生咗啲乜嘢事，跟住我朋友就上網查吓到底搞邊科搞到咁大陣仗喇。



原來每年由 7 月 1 日到 8 月 15 日呢段期間，喺 Grindelwald 嘅 Dorfstrasse 主街呢度每逄星期三晚上都會舉行一個名為 Street Festival in Grindelwald 嘅旅遊活動，由晚上八點到零晨 Dorfstrasse 都會封街，各式攤檔同表演節目就喺 Dorfstrasse 呢個臨時場地上舉行。

我哋就當然唔會錯過呢個揍熱鬧嘅機會啦，首先第一場騷係一隊當地嘅樂團演唱傳統嘅瑞士山歌。



從瓢零燕到雞攻擊之術，印象中我聽過嘅瑞士山歌都係日本人唱嘅，今次終於有機會聽返次由瑞士人唱嘅瑞士山歌喇。



聽完山歌跟住就行吓街上嘅攤位喇，查實主要都係各式飲飲食食同音樂表演，啲 Band Shows 水準唔錯檔檔都幾好聽唔係得個嘈字嗰隻。



我哋喺街上影吓相睇吓騷咁，查實呢一日都玩到好攰唔甫得太夜，到夜晚九點幾我哋就返民宿休息，抖足精神準備下一日嘅行程嘞。