向 Yorkshire 進發 - Harrogate . Knaresborough Castle . Knaresborough Viaduct

行程第三日係星期六，本身係夾好周六日趁人哋放假去探一探早排移咗民過去嘅朋友，朋友係住喺 Yorkshire 近 Harrogate 嘅一個小鎮，我哋呢日朝早就由倫敦嘅 King Cross Station 搭火車過去。


呢程火車嘅車飛係喺出發前三月中嗰陣買嘅，之前兩日因為同行朋友唔見咗護照要搞補領，當時我考慮過萬一要遲一兩日先可以離開倫敦嘅話啲交通可以點安排。


嗰陣試過上訂火車嘅 LNER 官網查返再買過張火車飛嘅價錢，先發覺如果臨起行前先去買火車飛嘅話，不但班次嘅選擇好有限，好多都係夜晚十點打後開車嘅時間，重要啲票價係我三月嗰陣訂飛票價嘅差唔多一倍。好彩最後都可以跟原定計劃起行，不過呢個故事就俾咗個教訓我哋，計劃得到嘅話買英國嘅火車飛真係要盡可能早幾個月預訂。


呢程火車全程三個鐘，我哋上晝 11:30 上車，晏晝兩點幾鐘就到達 Harrogate 同朋友會合。



落咗車朋友先帶我哋喺市鎮四圍逛吓，之後再出車去附近一個叫 Knaresborough Castle 嘅景點打咗陣卡。


城堡西北邊橫跨 River Nidd 一條名為 Knaresborough Viaduct 嘅橋粱亦係當地一個著名景點嚟。


行過吓附近一啲景點，朋友就帶我哋返屋企睇吓樓做吓移民家訪。