倫敦夜晚景點 - Tower Bridge . The Shard 夜景

打完卡回程行返去 Bank Station，途經一座工業風幾得意嘅建築，呢座嘢名為 Lloyd's Building，係保險巨頭 Lloyd's of London 嘅總部嚟。

另外重有一座都係幾特別嘅商業大樓叫 The Gherkin，呢座嘢當年 2004 年開幕之後幾年間曾經得過好幾個建築獎項，係倫敦市一座幾標誌性嘅地標建築嚟。

我哋返到住宿處簡單食啲嘢攤唞咗陣，見開始日落就再出動諗住行一陣夜街影吓夜景嘞。


喺倫敦影夜景嚟講，識影嘅一定係去 Tower Bridge 度影。



我哋搭 Tube 去到 Tower Hill Station 落車，原本都有啲擔心夜麻麻條街會好靜，不過出咗 Underground 站之後見到來往 Tower Bridge 嘅人潮絡繹不絕，根本都唔使睇地圖認路，就咁跟住啲人行就去到條橋。


到步之後查實都等咗一陣等個天黑齊先開始影相。


喺橋墩旁邊嘅河畔影咗一陣相，跟住就上返橋面睇吓風景。


喺 Tower Bridge 下面 River Thames 泰晤士河南岸嗰邊，圍住 The Shard 有幾座通稱為 More London 嘅建築同公共空間。


都係後來返到香港睇返其他朋友嘅相先知，喺嗰邊望返去 Tower Bridge 嘅夜景原來都幾唔錯，如果下次有機會再去倫敦嘅話都會考慮揾晚去嗰邊行吓。