英國自鴐遊 - 劍橋 . Cambridge American Cemetery 劍橋美軍紀念墓園

星期一朝早，朋友先出車載我哋去附近一個大城 Leeds 出車，呢次我哋係經 Sixt 租車，開始自駕行程嘅第一站係 Cambridge。



我哋朝早十點幾鐘出發，晏晝點零鐘先喺中途 Peterborough 一間 Extra Service Area 歇一歇食個晏。




呢間 Motorway Service 有得免費泊車，之前一日喺 Harrogate 嗰位朋友都特別推介我哋去 Cambridge 中途可以去呢度停一站休息吓。



下一站喺 Cambridge 嘅住宿要晏晝四點幾先有得 check-in，見中間有段時間可以浪費吓，於是我哋先去 Cambridge 外圍一個叫 Cambridge American Cemetery 嘅地方行吓。


嚟呢度參觀無論入場同泊車都係免費嘅，算係呢次行程中少數完全唔使科水就去得嘅景點。


呢個劍橋美軍紀念墓園最初係由劍橋大學喺 Madingley Hill 捐出嘅一幅臨時墓地開始嘅，嗰幅墓地主要係安葬二戰時喺英國陣亡嘅美國軍人。


二戰結束後，American Battle Monuments Commission 就揀咗喺 Cambridge 依家呢個位置作為永久墓園嘅選址，而呢個墓園就喺 1956 年正式落成。


呢度總共安置咗 3,809 座墓碑，佔地超過 30 英畝。


喺墓園週邊有一幅刻咗戰爭中失蹤軍人名字嘅牆壁，牆壁上嘅雕刻係一位美國藝術家 Wheeler Williams 嘅作品嚟。

墓園兩邊各有一座記念館，當中比較大嘅一座入面有個展覽廳。


而另一邊嘅記念館就係一座比較細嘅教堂嚟。


我哋喺墓園行到三點幾四點，見差唔多時間可以去住宿處 check-in，於是就離場出車去 Cambridge 市內。