劍橋 Cambridge 住宿 - 英國自鴐遊

今次行程除咗倫敦第一站嘅住宿有些少伏味之外，其他每一站嘅住宿都唔太差。




呢一站喺 Cambridge 嘅住宿經 booking.com 預訂，一晚房租盛惠 HKD 1,473。 房間有兩張單人床同一張雙人床，有獨立洗手間唔使同房客共用。



啲毛巾被鋪都算乾淨。


呢間住宿係呢次行程中唯一包早餐嘅住宿，佢個英式早餐都幾豐盛吓，我嗰朝早都只係食得落大半碟。



安頓好啲行李就出去行一陣街，呢間住宿距離 River Cam 康河唔算太遠，步行十零分鐘就去到。

呢日行街除咗想散吓步之外，另外都諗住為第二日喺 River Cam 搭艇仔遊船河比較吓價錢。



我哋沿住河邊一路行一路都見有啲租艇嘅街站拉客，不過問過啲價錢，就算係坐當日最尾一班艇嘅價錢同我之前喺網上睇到嘅價錢比都依然係遍貴，而一般時段佢哋報嘅價就比網上預訂嘅價錢差起碼一倍。


呢個故事教訓我哋，去 River Cam 坐艇識坐嘅一定係預先上網預訂咗至去坐，結果我係喺之後嗰朝早一路食早餐一路上網預訂，訂好飛食完早餐就行去碼頭上船。