巨石陣 Stonehenge - 倫敦附近景點

入去 Stonehenge 個石陣之前要先經過一座收費亭連展覽廳嘅主樓，主樓出面有個幾大嘅停車場，可以免费泊車。


呢個景點嘅入場費都唔平，成人每位盛惠 £26.3。


巨石陣嗰堆石頭同主樓都有段距離，步行過去腳程快嘅都要廿零分鐘，入場呢程路我哋就選擇搭一程免費嘅穿梭巴士過去。


呢座圓形嘅石林查實已經喺呢片平原上屹立咗幾千年，喺 1986 年呢座古蹟被列為世界文化遺產。


巨石陣開始興建嘅時間可以追溯到公元前 4000 - 2000 年。


據考古學家嘅考證，巨石陣第一階段修建大約由公元前 3100 開始了。


之後喺公元前 2100 年至公元前 1900 年期間分開幾個唔同階段修建。


呢座巨石陣亦唔係喺起好之後就一直維持住現今所見嘅結構，唔計嗰啲二千幾三千年前嘅變化，就算喺近代亦發生過種種事件。


例如 1779 年曾經有三塊巨石冧過，近至 17 至 18 世紀嘅近代亦有唔少喺石陣入面嘅石塊係俾人撻走扑爛作為建築材料。


而史前嘅人做乜要起呢座嘢到依家都重係眾說紛紜，有人話佢係一座天文儀，有人話佢係一座用嚟做祭祀活動嘅聖壇，亦有人認為呢座嘢查實係一塊墓地嚟。